સુરતની નવી સિવિલ હોસ્પિટલમાં ફરજ બજાવતા ડોક્ટરના આપઘાતના ચકચારી કેસમાં રાજ્ય સરકાર દ્વારા ત્વરિત કાર્યવાહી હાથ ધરવામાં આવી છે. ગૃહ અને આરોગ્ય રાજ્ય મંત્રી પ્રફુલ પાનશેરિયાએ ઘટનાની ગંભીરતાને ધ્યાને લઈને તાત્કાલિક અસરથી તપાસ કમિટીની રચના કરવા આદેશ આપ્યા છે. નવી સિવિલ હોસ્પિટલના ડીનની અધ્યક્ષતામાં આ ખાસ તપાસ કમિટીની રચના કરવામાં આવી છે.
24 કલાકમાં રિપોર્ટ સોંપવા મંત્રીનો કડક આદેશ
આરોગ્ય મંત્રીએ તપાસ કમિટીને સમગ્ર ઘટના અંગે નિષ્પક્ષ અને ઊંડાણપૂર્વક તપાસ કરીને આગામી 24 કલાકમાં જ પોતાનો અહેવાલ (રિપોર્ટ) સોંપવા માટે કડક સૂચના આપી છે. આ કેસમાં રેગિંગ અથવા તો કોઈ પણ પ્રકારનો માનસિક ત્રાસ આપવામાં આવ્યો હતો કે કેમ તે તમામ પાસાઓ પર સઘન તપાસ કરવામાં આવશે. સત્ય સામે લાવવા માટે હોસ્ટેલમાં રહેતા તમામ વિદ્યાર્થીઓના વિધિવત નિવેદનો પણ નોંધવામાં આવશે.