સુરત શહેરની અત્યંત જાણીતી અને પ્રતિષ્ઠિત મેરિયટ (Marriott) હોટેલમાંથી ખાણીપીણીની ગુણવત્તા અને સ્વચ્છતા સામે ગંભીર સવાલો ઊભા કરતી ઘટના સામે આવી છે. 29 ઓગસ્ટની મોડી રાત્રે મેરિયટ હોટેલના રેસ્ટોરન્ટમાં આવેલા એક ગ્રાહક સાથે આ ચોંકાવનારો બનાવ બન્યો હતો. ગ્રાહકને પીરસવામાં આવેલી કૂકીઝ (Cookies)માંથી અચાનક લાકડાના અણીદાર ટુકડા નીકળ્યા હતા. ગ્રાહકે જેવી કૂકીઝ મોંમાં મૂકી કે તુરંત આ તીક્ષ્ણ લાકડાનો ટુકડો મોંમાં વાગ્યો હતો, જોકે સદનસીબે ગ્રાહકને મોટી અને ગંભીર ઈજા થતાં-થતાં રહી ગઈ હતી.
હોટેલ મેનેજમેન્ટે ભૂલ સ્વીકારી પણ નિવેદન આપવાથી હાથ ઊંચા કર્યા
આટલી મોટી અને મોંઘી હોટેલમાં પીરસવામાં આવતા ખોરાકમાં આવી ઘોર બેદરકારી સામે આવતાં ગ્રાહકે તુરંત હોટેલ સંચાલકો સમક્ષ ભારે વિરોધ નોંધાવ્યો હતો. હોટેલ મેનેજમેન્ટે ગ્રાહક સમક્ષ પોતાની ભૂલ તો સ્વીકારી લીધી હતી, પરંતુ જ્યારે કેમેરા સામે નિવેદન આપવાની કે લેખિતમાં પોતાની ભૂલનો અસ્વીકાર-સ્વીકાર કરવાની વાત આવી ત્યારે તેમણે સ્પષ્ટપણે હાથ ઊંચા કરી દીધા હતા. મેનેજમેન્ટના આ પ્રકારના બિનજવાબદાર વલણને કારણે ગ્રાહકના આક્રોશમાં વધુ ઉમેરો થયો હતો.