સુરતના માંગરોળમાં નેશનલ હાઇવે 48 પર આવેલા સાવા-નંદાવ બ્રિજને તોડવાની કામગીરી શરૂ કરવામાં આવી છે. વર્ષ 2021માં જાહેર જનતા માટે ખુલ્લો મૂકવામાં આવેલા આ બ્રિજને માત્ર 5 વર્ષમાં જ જોખમી બની જતા તોડી પાડવાનો નિર્ણય લેવામાં આવ્યો છે.
સાવા-નંદાવ બ્રિજ વર્ષ 2021માં વાહનવ્યવહાર માટે ખુલ્લો મૂકવામાં આવ્યો હતો. જોકે, થોડા જ વર્ષોમાં બ્રિજની સ્થિતિ જોખમી બનતા તેની સલામતી સામે ગંભીર સવાલો ઊભા થયા છે. આખરે પ્રશાસને બ્રિજ તોડી પાડવાનો નિર્ણય લીધો છે.
હાલ બ્રિજને તોડી પાડવાની કામગીરી શરૂ કરવામાં આવી છે. કામગીરી દરમિયાન વાહનવ્યવહારને અસર ન થાય તે માટે વૈકલ્પિક વ્યવસ્થા કરવામાં આવી છે. બંને તરફના સર્વિસ રોડને RCC બનાવી તેના પરથી ટ્રાફિક ડાયવર્ટ કરવામાં આવ્યો છે.
બ્રિજ બનાવનાર હરિયાણાની કંપની સામે પણ અગાઉ કાર્યવાહી કરવામાં આવી હોવાનું સામે આવ્યું છે. કંપનીને બ્લેકલિસ્ટ કરવામાં આવી હતી અને તેની ડિપોઝિટ પણ જપ્ત કરવામાં આવી હોવાનું જણાવાયું છે.
જાહેર જનતા માટે વર્ષ 2021માં ખુલ્લો મૂકાયેલો બ્રિજ માત્ર 5 વર્ષમાં જ જોખમી બની જતા બાંધકામની ગુણવત્તા અને દેખરેખ સામે સવાલો ઊભા થયા છે. કરોડો રૂપિયાના જાહેર કામમાં આટલી ટૂંકી અવધિમાં આવી સ્થિતિ કેમ સર્જાઈ તે અંગે જવાબદારી નક્કી કરવાની માંગ પણ ઉઠી શકે છે.
બ્રિજ તોડવાની કામગીરી પૂર્ણ ન થાય ત્યાં સુધી બંને તરફના સર્વિસ રોડ પરથી વાહનો પસાર થઈ રહ્યા છે. ટ્રાફિક વ્યવસ્થા જળવાઈ રહે તે માટે વૈકલ્પિક માર્ગનો ઉપયોગ કરવામાં આવી રહ્યો છે.
આ પણ વાંચો : Nepal Flood : ભયાનક પૂર વચ્ચે એકલું ઘર અડીખમ, પાણીમાં આખું ગામ તણાયું છતાં મકાન બચી ગયું જુઓ ભયાનક Video