સુરતની વિખ્યાત સુમુલ ડેરીના પ્રમુખ અને ઉપપ્રમુખની આજે સોમવારે યોજાનારી ચૂંટણી અચાનક મુલતવી રાખવામાં આવતાં દક્ષિણ ગુજરાતના સહકારી અને રાજકીય ક્ષેત્રે મોટો ગરમાવો આવી ગયો છે. સુમુલ ડેરીની ચૂંટણીમાં 15 બેઠકો પર ભાજપે ભવ્ય વિજય મેળવ્યો હતો. જોકે, ભાજપના જ અગ્રણી નેતાઓ વચ્ચે ચાલી રહેલી આંતરિક ખેંચતાણ અને વિવાદના કારણે આ ચૂંટણી પાછી ઠેલવામાં આવી હોવાની જોરશોરથી ચર્ચાઓ જાગી છે.
છેલ્લી ઘડીએ આ પ્રક્રિયા રદ કરવામાં આવી
આજે સવારે સુમુલ ડેરી ખાતે ચૂંટણી અધિકારીના અધ્યક્ષસ્થાને પ્રમુખ અને ઉપપ્રમુખની ચૂંટણી પ્રક્રિયા હાથ ધરવાની હતી, પરંતુ છેલ્લી ઘડીએ આ પ્રક્રિયા રદ કરવામાં આવી હતી. સહકારી વિભાગની મનમાની અને રાજકીય દબાણને કારણે ચૂંટણી મુલતવી રાખવામાં આવી હોવાના ગંભીર આક્ષેપો થઈ રહ્યા છે. ડેરીમાં વહીવટદાર શાસન લંબાવવાના કારણે લાખો પશુપાલકોને દૂધના યોગ્ય ભાવ નથી મળી રહ્યા, જેનાથી તેમને મોટું આર્થિક નુકસાન સહન કરવું પડી રહ્યું છે.