સુરતમાં ભારે વરસાદ અને સ્થાનિક ખાડી ઓવરફ્લો થવાને કારણે સર્જાયેલી ખાડીપૂરની સ્થિતિ હવે ધીમે-ધીમે નિયંત્રણમાં આવી રહી છે. સુરતના મોટાભાગના રહેણાંક વિસ્તારો અને મુખ્ય માર્ગો પરથી પૂરના પાણી સંપૂર્ણપણે ઓસરી ગયા છે અને વાહનવ્યવહાર પૂર્વવત થયો છે. પરંતુ, સુરતની આર્થિક કરોડરજ્જુ ગણાતા રીંગ રોડ ટેક્સટાઇલ માર્કેટ વિસ્તારમાં પૂરના કારણે સર્જાયેલી તારાજીના અસલી દ્રશ્યો હવે સામે આવી રહ્યા છે. સુરતના અગ્રણી કાપડ માર્કેટોના કમ્પાઉન્ડ અને રસ્તા સાફ થઈ ગયા છે, પરંતુ માર્કેટોના અંડરગ્રાઉન્ડ બેઝમેન્ટ અને લોઅર પાર્કિંગ એરિયા હજુ પણ પૂરના પાણીથી ભરેલા છે.
પાર્સલો અને દુકાનો જળમગ્ન
સુરત કાપડ માર્કેટમાંથી દરરોજ દેશભરમાં હજારો ટ્રક ભરીને કાપડના પાર્સલ મોકલવામાં આવે છે. ટ્રાન્સપોર્ટમાં મોકલવાના બાકી હોય અથવા તો ડિલિવરી માટે આવેલા હોય તેવા હજારો કાપડના પાર્સલો વેપારીઓએ સુરક્ષિત સમજીને માર્કેટના બેઝમેન્ટ પાર્કિંગ એરિયામાં રાખ્યા હતા. ખાડીના પૂરના પાણી અચાનક માર્કેટના ભોંયરાઓમાં ઘૂસી જતાં, આ તમામ કિંમતી કાપડના પાર્સલો દિવસોથી પાણીમાં ડૂબેલા રહ્યા છે. કાપડના તાકા અને તૈયાર વસ્ત્રો ગંદા પાણીમાં પલળી જવાથી તે સંપૂર્ણપણે નકામા થઈ ગયા છે. આ ઉપરાંત બેઝમેન્ટમાં આવેલી હજારો નાની-મોટી દુકાનોમાં પણ 5 થી 7 ફૂટ સુધી પાણી ભરાઈ જતાં અંદર રાખેલો ફર્નિચર, કમ્પ્યુટર સિસ્ટમ અને સ્ટોક નાશ પામ્યો છે, જેનાથી વેપારીઓને કરોડો રૂપિયાનું આંધણ નુકસાન વેઠવાનો વારો આવ્યો છે.