સુરત શહેરના ઉન વિસ્તારમાંથી એક મોટા અને ચિંતાજનક સમાચાર સામે આવ્યા છે. ઉન વિસ્તારમાં આવેલા વાંઝ ઇક્લેરા રોડ પાસે એક વિશાળ ખાનગી કાપડના ગોડાઉનમાં અચાનક ભીષણ આગ ફાટી નીકળી હતી. આ આગ એટલી ભયાનક છે કે, કલાકો વીતી જવા છતાં પણ તે હજુ સુધી સંપૂર્ણપણે બેકાબૂ છે અને ધુમાડાના ગોટેગોટા દૂર-દૂર સુધી નજરે પડી રહ્યા છે.
10 એકર વિસ્તારમાં ફેલાયેલું છે વેસ્ટેજ કાપડનું ગોડાઉન
પ્રાપ્ત વિગતો અનુસાર, આ આખું કાપડનું ગોડાઉન અંદાજે 10 એકડ જેટલા વિશાળ વિસ્તારમાં ફેલાયેલું છે, જેમાં મોટા પ્રમાણમાં વેસ્ટેજ કાપડનો જથ્થો સંગ્રહિત કરવામાં આવ્યો હતો. ગોડાઉનમાં કાપડનો જથ્થો ખૂબ જ વધારે હોવાના કારણે આગ વારંવાર ભડકી રહી છે અને તેને કાબૂમાં લેવામાં ફાયર વિભાગની ટીમોને ભારે જહેમત ઉઠાવી પડી રહી છે. અનુમાન લગાવવામાં આવી રહ્યું છે કે સવારે 8:30 વાગ્યાની આસપાસ આ આગ લાગી હતી, જ્યારે ફાયર વિભાગને સવારે 10:10 વાગ્યે આ અંગેની જાણ કરવામાં આવી હતી.
