અમદાવાદના નિકોલમાં બેફામ ફોર્ચ્યુનરે ફૂટપાથ પર ચડી 3 નિર્દોષ લોકોનો ભોગ લીધો હતો, તેવા જ પ્રકારનો એક કાળજું કંપાવી દેતો અકસ્માત સુરતના પોશ ગણાતા વેસુ વિસ્તારમાં સર્જાયો છે. સદનસીબે અહીં અમદાવાદ જેવી મોટી જાનહાનિ થતાં રહી ગઈ છે, પરંતુ બેદરકાર ડ્રાઇવિંગે ફરી એકવાર ફૂટપાથ પર સૂતેલા લાચાર શ્રમિકોની જિંદગી જોખમમાં મૂકી દીધી છે.

કાર સ્ટ્રીટ લાઈટના થાંભલા સાથે અથડાઈ 

વેસુ વિસ્તારમાં પૂરપાટ ઝડપે આવી રહેલી એક લક્ઝુરિયસ કારના ચાલકે સ્ટિયરિંગ પરથી કાબૂ ગુમાવતાં કાર સીધી રોડની સાઈડમાં આવેલા મજબૂત સ્ટ્રીટ લાઈટના થાંભલા સાથે ધડાકાભેર અથડાઈ હતી અને ત્યારબાદ ફૂટપાથ પર ચડી ગઈ હતી. આ ભયાનક ટક્કરમાં સ્ટ્રીટ લાઈટનો થાંભલો તૂટીને રસ્તા પર પટકાયો હતો, જ્યારે ફૂટપાથ પર સૂતેલા શ્રમિકો પૈકી એક વ્યક્તિને ગંભીર ઈજાઓ પહોંચી હતી. સ્થાનિક વર્તુળોમાં ચર્ચાતી વિગતો મુજબ અકસ્માત સર્જનાર કાર એક મહિલા ચલાવી રહી હતી.

થાંભલો તૂટી પડ્યો ને ફૂટપાથ પર મચી નાસભાગ

કાર એટલી તેજ ગતિમાં હતી કે ડિવાઈડર/સાઈડમાં આવેલો સ્ટ્રીટ લાઈટનો લોખંડનો થાંભલો મૂળમાંથી ઉખડીને રસ્તા પર ધસી પડ્યો હતો. કારના આગળના ભાગનો પણ કચ્ચરઘાણ વળી ગયો હતો. અકસ્માત સમયે ફૂટપાથ પર કેટલાક શ્રમજીવીઓ સૂતા હતા. થાંભલા અને કારની ટક્કરની લપેટમાં આવતાં એક વ્યક્તિ ગંભીર રીતે ઘવાયો છે, જ્યારે અન્ય લોકોને સામાન્ય ઈજાઓ પહોંચી છે.રાત્રિના સુમારે થયેલા જોરદાર ધડાકા અને ચીસાચીસના કારણે આસપાસના સ્થાનિકો અને રાહદારીઓમાં ભારે નાસભાગ અને અફરાતફરી મચી ગઈ હતી. પ્રત્યક્ષદર્શીઓ મુજબ અકસ્માત સમયે કાર એક મહિલા હંકારી રહી હતી. અકસ્માત બાદ સ્થાનિકો સ્થળ પર દોડી આવ્યા હતા.

આ પણ વાંચો: Gandhinagar: રાજ્યના RTO તંત્રમાં મોડી રાત્રે નિરીક્ષકોના ટેબલ બદલાયા,વર્ગ-3 માં 359 AMVIની સાગમટે બદલી