સુરેન્દ્રનગર જિલ્લાના લીંબડી-અમદાવાદ હાઇવે પર કાનપરા નજીક આવેલી N.N. પોલીમર ફેક્ટરીમાં રાજકોટ રેન્જ આઈજી અને જીપીસીબી (GPCB) ની સંયુક્ત ટીમે દરોડા પાડ્યા છે. પ્લાયવુડ સહિત વિવિધ પ્રકારની સીટો બનાવતી આ ફેક્ટરીમાં છેલ્લા બે દિવસથી સઘન તપાસ ચલાવવામાં આવી રહી છે. ફેક્ટરીમાં મિથેન અને ઇથેન જેવા કેમિકલના ગેરકાયદે મિશ્રણથી ભારે પ્રદૂષણ ફેલાતું હોવાની ફરિયાદો ઉઠ્યા બાદ આ કડક કાર્યવાહી હાથ ધરવામાં આવી છે.
કેમિકલના સેમ્પલ લેવાયા, રિપોર્ટ બાદ થશે કાર્યવાહી
આ સઘન તપાસ દરમિયાન GPCB ની ટીમે ફેક્ટરીમાંથી વપરાતા કેમિકલ અને પ્રદૂષણ સંબંધિત વિવિધ સેમ્પલો એકત્રિત કરીને લેબોરેટરીમાં ચકાસણી અર્થે મોકલી આપ્યા છે. તપાસ અધિકારીઓના જણાવ્યા મુજબ, કેમિકલ વિશ્લેષણનો સત્તાવાર રિપોર્ટ આવ્યા બાદ નિયમ મુજબ કાયદેસરની દંડાત્મક કાર્યવાહી કરવામાં આવશે. સ્થાનિક લોકો દ્વારા અગાઉ પણ આ ફેક્ટરીમાંથી ફેલાતા પ્રદૂષણ અંગે અનેકવાર રજૂઆતો કરવામાં આવી હતી, પરંતુ કોઈ નક્કર પગલાં લેવાયા ન હતા.