પ્રકાશના મહાપર્વ દિવાળીની ઉજવણીને આડે હવે માત્ર 48 કલાકનો જ સમય બાકી રહ્યો છે ત્યારે વડોદરા શહેરમાં રોજગારી અર્થે રહેતા પરપ્રાંતીય અને અન્ય જિલ્લાના શ્રમિકો તેમજ નોકરિયાતો વતન જવા માટે મોટી સંખ્યામાં નીકળી પડ્યા છે. વડોદરા સેન્ટ્રલ એસટી બસ સ્ટેન્ડ ખાતે વહેલી સવારથી જ મુસાફરોનો ભારે ધસારો જોવા મળી રહ્યો છે. મુસાફરોની વધારાની ભીડને પહોંચી વળવા માટે વડોદરા એસટી વિભાગ દ્વારા ખાસ 100 જેટલી વધારાની (એક્સ્ટ્રા) બસોનું સંચાલન શરૂ કરવામાં આવ્યું છે. આમ છતાં પંચમહાલ, દાહોદ, ઝાલોદ અને લીમખેડા તરફ જતી તમામ બસો સંપૂર્ણપણે ‘હાઉસફુલ’ થઈને દોડી રહી છે, જેના કારણે હજારો મુસાફરો કલાકો સુધી પ્લેટફોર્મ પર બસની રાહ જોતા અટવાઈ પડ્યા છે.
દાહોદ-પંચમહાલ તરફ સૌથી વધુ ધસારો: પગ મૂકવાની જગ્યા નથી
દિવાળી અને બેસતા વર્ષના તહેવારો વતનમાં ઉજવવા માટે દાહોદ, ઝાલોદ, લીમખેડા, છોટાઉદેપુર અને ગોધરા તરફ જતા શ્રમિક પરિવારોની સંખ્યા સૌથી વધુ છે. આ રૂટની તમામ નિયમિત અને એક્સ્ટ્રા બસો પેક થઈ ગઈ છે.મુસાફરોની મુખ્ય ફરિયાદ એ છે કે ભરૂચ, અંકલેશ્વર અને સુરત તરફથી ઉપડીને વડોદરા થઈ પંચમહાલ જતી બસો ત્યાંથી જ ખીચોખીચ ભરાઈને આવે છે. પરિણામે વડોદરા ડેપો પર બસ ઊભી રહે ત્યારે સ્થાનિક મુસાફરોને ચડવાની પણ જગ્યા મળતી નથી. વહેલી સવારે પાંચ વાગ્યાથી મહિલાઓ, નાના બાળકો અને માલસામાન સાથે પરિવારો પ્લેટફોર્મ પર બેસીને બસ ક્યારે આવે તેની કાગડોળે રાહ જોઈ રહ્યા છે.