ભારત સરકારના રક્ષામંત્રી રાજનાથ સિંહ આજે વહેલી સવારે વિશેષ વિમાન મારફતે વડોદરા એરપોર્ટ પર આવી પહોંચ્યા હતા. એરપોર્ટના વીઆઈપી લાઉન્જમાં ગુજરાતના મુખ્યમંત્રી ભૂપેન્દ્ર પટેલ, રાજ્યના મંત્રીઓ, વડોદરાના મેયર અને ઉચ્ચ વહીવટી તેમજ પોલીસ અધિકારીઓએ પુષ્પગુચ્છ આપીને તેમનું ભવ્ય સન્માન કર્યું હતું. આ પ્રવાસ વડોદરા અને સમગ્ર ગુજરાતના ઔદ્યોગિક વિકાસ માટે અત્યંત મહત્વપૂર્ણ માનવામાં આવી રહ્યો છે.
ડિફેન્સ અને એરોસ્પેસ સેમિનાર પર વૈશ્વિક નજર
વડોદરામાં હાલ વાઈબ્રન્ટ ગુજરાત રીજીનલ સમિટ (VGRC) ની શ્રેણી ચાલી રહી છે, જેમાં આજે સંરક્ષણ અને એરોસ્પેસ ક્ષેત્ર પર કેન્દ્રિત વિશેષ સેમિનારનું આયોજન કરવામાં આવ્યું છે. વડોદરામાં તાજેતરમાં જ સી-૨૯૫ (C-295) મિલિટરી એરક્રાફ્ટના મેન્યુફેક્ચરિંગ પ્લાન્ટની શરૂઆત થઈ ચૂકી છે, ત્યારે રક્ષામંત્રીની આ મુલાકાતથી સંરક્ષણ ક્ષેત્રે કામ કરતી સ્થાનિક એમએસએમઈ (MSME) કંપનીઓને મોટી તકો મળશે. રક્ષામંત્રી સેમિનારમાં ઉપસ્થિત રહીને ભારતના 'મેક ઇન ઇન્ડિયા' અંતર્ગત ડિફેન્સ કોરિડોર અને એરોસ્પેસ સેક્ટરમાં થનારા નવા રોકાણો અને પ્રોજેક્ટ્સની જાહેરાત કરી શકે છે.
