દિવાળીનો તહેવાર ખુશીઓ અને રોશનીનો પર્વ ગણવામાં આવે છે, પરંતુ વડોદરા શહેર માટે આ વર્ષે દિવાળીના 5 દિવસ ભારે અને ચિંતાજનક સાબિત થયા છે. મધ્ય ગુજરાતની સૌથી મોટી એવી SSG હોસ્પિટલ દ્વારા જાહેર કરવામાં આવેલા આંકડાઓએ સૌ કોઈને ચોંકાવી દીધા છે. તહેવારની ઉજવણી દરમિયાન અકસ્માતો અને હિંસક બનાવોમાં મોટો વધારો જોવા મળ્યો છે, જેના કારણે અનેક પરિવારોએ પોતાના સ્વજનો ગુમાવ્યા છે.
રોડ અકસ્માત અને મારામારીના બનાવોમાં ચિંતાજનક ઉછાળો
હોસ્પિટલના સત્તાવાર ડેટા મુજબ, દિવાળીના આ 5 દિવસ દરમિયાન સમગ્ર શહેરમાંથી અકસ્માતના કુલ 135 કેસ નોંધાયા છે. આ ઉપરાંત, શહેરમાં જુદી જુદી જગ્યાએ થયેલી મારામારીની ઘટનાઓમાં કુલ 59 લોકો ગંભીર રીતે ઈજાગ્રસ્ત થયા છે. તહેવારના ઉત્સાહમાં બેફામ વાહન ચલાવવાની અને સામાન્ય બાબતોમાં ઉશ્કેરાઈ જવાની ઘટનાઓથી હોસ્પિટલના ટ્રોમા સેન્ટરમાં સતત ભારે ધસારો જોવા મળ્યો હતો.
કુલ 35 લોકોએ ગુમાવ્યા પ્રાણ, અકસ્માતો અને અન્ય કારણો બન્યા જવાબદાર
દિવાળીના તહેવારથી લઈને અત્યાર સુધીના સમયગાળામાં કુલ 35 લોકોનાં મોત નિપજ્યાં છે, જે અત્યંત દુખદ છે. આ મૃત્યુઆંકમાં અકસ્માતના કારણે 15 લોકોનાં મોત થયા છે, જ્યારે અન્ય વિવિધ કારણોસર 20 લોકોનાં જીવ ગયા છે. તહેવારની ખુશીઓ શોકમાં ફેરવાઈ જતાં હોસ્પિટલ પરિસરમાં પણ ગમગીની છવાઈ ગઈ હતી.
ફટાકડાથી દાઝવાના કેસ અને તંત્રની સતત સજ્જતા
મોટી દુર્ઘટનાઓ વચ્ચે રાહતની વાત એ રહી કે ફટાકડા ફોડતી વખતે દાઝી જવાના માત્ર 5 જ કેસ નોંધાયયા છે, જે દર્શાવે છે કે લોકોએ ફટાકડા ફોડવામાં થોડી સાવચેતી જાળવી હતી. આટલી મોટી સંખ્યામાં ઇમરજન્સી કેસો આવવા છતાં, એસએસજી હોસ્પિટલનો મેડિકલ અને ઇમરજન્સી સ્ટાફ કોઈપણ મુશ્કેલી વગર સતત કાર્યરત રહ્યો હતો અને દર્દીઓની સારવારમાં ખડેપગે સેવા આપી હતી.
આ પણ વાંચો: Explainer: શું 2027ની ચૂંટણીમાં આદિજાતિ સમાજ બનશે કિંગ મેકર?
