વડોદરા શહેરની શાળાઓમાં વિદ્યાર્થીઓ પર શિક્ષકો દ્વારા ગુજારવામાં આવતી માનસિક અને શારીરિક ક્રૂરતાના કિસ્સાઓ અટકવાનું નામ નથી લઈ રહ્યા. હજુ થોડા સમય પહેલા જ બનેલી આવી જ એક ઘટનાની શાહી સુકાઈ નથી ત્યાં ફતેગંજની પ્રતિષ્ઠિત ગણાતી રોઝરી સ્કૂલમાંથી એક ચોંકાવનારો કિસ્સો પ્રકાશમાં આવ્યો છે. શાળાના પી.ટી. ટીચરે ધોરણ 5 માં અભ્યાસ કરતા એક માસૂમ વિદ્યાર્થીને માત્ર એટલા માટે ગંભીર શારીરિક સજા આપી કારણ કે તે પોતાના વાળમાં નિયમ મુજબ તેલ લગાવીને શાળાએ આવ્યો નહોતો. શિક્ષકે માનવતા ભૂલીને આ માસૂમ બાળકને કડક તડકામાં સ્કૂલના મેદાનના એક-બે નહીં પરંતુ પૂરા 6 રાઉન્ડ દોડવાની ફરજ પાડી હતી.
બીમારીથી અજાણ શિક્ષક અને લથડતી તબિયત
સૌથી ગંભીર અને ચિંતાજનક બાબત એ છે કે ભોગ બનનાર વિદ્યાર્થી હૃદયરોગની ગંભીર બીમારીથી પીડાઈ રહ્યો છે, અને તબીબી નિયમો અનુસાર તેને વધુ પડતો શારીરિક શ્રમ કે દોડધામ કરવાની સખત મનાઈ છે. 6 રાઉન્ડ દોડવાના કારણે બાળકની તબિયત લથડી ગઈ હતી અને તે અત્યંત ગભરાઈ ગયો હતો. બાળકે ઘરે જઈને વાલીને આ અંગે વાત કરતા વાલીના હોશ ઉડી ગયા હતા. બાળકના ભવિષ્ય અને સ્વાસ્થ્ય સાથે થયેલા આ ગંભીર ચેડાં મામલે વાલીએ તુરંત જ વડોદરા જિલ્લા શિક્ષણાધિકારી (DEO) કચેરીનો સંપર્ક કરી લેખિત ફરિયાદ નોંધાવી છે. આ ઉપરાંત, બાળ અધિકાર સુરક્ષા માટે કાર્યરત 'ચાઈલ્ડ હેલ્પ લાઈન' ની પણ સત્તાવાર મદદ લેવામાં આવી છે.