વડોદરા શહેરના અકોટા વિસ્તારમાં આવેલી ટાઉનશીપમાં ગેરકાયદેસર રીતે પ્રતિબંધિત ઈ-સિગરેટનો મોટો જથ્થો છુપાવવામાં આવ્યો હોવાની ચોક્કસ બાતમી વડોદરા એસઓજી (SOG) ની ટીમને મળી હતી. આ બાતમીના આધારે પોલીસે દરોડો પાડીને ફ્લેટ/મકાનમાંથી ગેરકાયદેસર રીતે રાખવામાં આવેલી વિવિધ બ્રાન્ડની કુલ 402 નંગ પ્રતિબંધિત ઈ-સિગરેટનો જથ્થો ઝડપી પાડ્યો હતો. આ જપ્ત કરાયેલી ઈ-સિગરેટની બજાર કિંમત આશરે રૂ. 10 લાખ જેટલી થવા જાય છે.
અકોટા ટાઉનશીપમાં ગેરકાયદેસર ઈ-સિગરેટનું નેટવર્ક
સરકાર દ્વારા ઈ-સિગરેટ પર સંપૂર્ણ પ્રતિબંધ મૂકવામાં આવ્યો હોવા છતાં યુવાનોમાં તેનો ક્રેઝ વધારીને ગેરકાયદેસર કાળો કારોબાર ચલાવવામાં આવી રહ્યો હોવાનું સામે આવ્યું છે. દરોડા દરમિયાન પોલીસે ઘટનાસ્થળેથી એક કિશોર (સગીર) ને ઝડપી પાડી તેની અટકાયત કરી છે. પોલીસની પ્રાથમિક તપાસમાં બહાર આવ્યું છે કે આ પ્રતિબંધિત ઈ-સિગરેટનો જથ્થો મંગાવવામાં અને તેના વિતરણમાં મુખ્ય સૂત્રધાર શેફાન મેમણ અને અવેશ પટેલ છે.