વડોદરા શહેરની સૌથી મોટી સરકારી હોસ્પિટલ એવી સયાજી (SSG) હોસ્પિટલમાંથી પોલીસ સુરક્ષા વ્યવસ્થાની ઘોર લાપરવાહી સામે આવી છે. સંગઠિત અપરાધ સિન્ડિકેટ વિરોધી કાયદા ગુજસીટોક (GUJCTOC) હેઠળ જેલવાસ ભોગવી રહેલો કુખ્યાત આરોપી મોહસીન મીંડી પોલીસ જાપ્તાને ખુલ્લો ચકમો આપીને હોસ્પિટલમાંથી ફરાર થઈ ગયો છે. કડક પોલીસ પહેરો હોવા છતાં આટલો ગંભીર ગુનેગાર નાસી છૂટતાં વડોદરા પોલીસ બેડામાં ભારે ચકચાર અને દોડધામ મચી ગઈ છે.
મેલ વોર્ડમાં બેડ સાથે હથકડી બાંધીને રખાયો હતો
પ્રાપ્ત પ્રાથમિક વિગતો મુજબ, ગુજસીટોક જેવા કડક કાયદા હેઠળ ઝડપાયેલા આરોપી મોહસીન મીંડીની તબિયત લથડતાં તેને જેલ પ્રશાસન દ્વારા સારવાર અર્થે વડોદરાની SSG હોસ્પિટલમાં ખસેડવામાં આવ્યો હતો.તેને હોસ્પિટલના મેલ (પુરુષ) વોર્ડમાં દાખલ કરવામાં આવ્યો હતો.કડક જાપ્તાના નિયમો મુજબ આરોપીના હાથમાં હથકડી પહેરાવીને તેને સીધો દર્દીના બેડ સાથે બાંધીને રાખવામાં આવ્યો હતો.વોર્ડની અંદર અને બહાર પોલીસકર્મીઓ પણ જાપ્તા માટે સતત તૈનાત હતા.
બાથરૂમ જવાના બહાને રચી ભાગવાની યોજના
પોલીસ કર્મચારીઓની નજર ચૂકવીને નાસી જવા માટે આરોપીએ પૂર્વઆયોજિત બહાનું કાઢ્યું હતું.મોહસીન મીંડીએ સુરક્ષામાં રહેલા પોલીસ જવાનોને કુદરતી હાજતે (બાથરૂમ) જવું હોવાનું જણાવ્યું હતું.બાથરૂમ લઈ જવા માટે જેવી તેની હથકડી બેડ પરથી છોડવામાં આવી કે તરત જ તેણે ક્ષણભરની અસાવધાનીનો ફાયદો ઉઠાવ્યો હતો.પોલીસ જવાનોને ધક્કો મારી કે ચકમો આપીને તે વોર્ડમાંથી પળવારમાં રફુચક્કર થઈ ગયો હતો. જાપ્તાના જવાનો કઈ સમજે તે પહેલાં તે હોસ્પિટલ પરિસર બહાર નીકળી ગયો હતો.
પોલીસ બેડામાં દોડધામ
ગુજસીટોકના આરોપીના પલાયનની જાણ થતાં જ ઉચ્ચ પોલીસ અધિકારીઓ તાબડતોબ SSG હોસ્પિટલ ખાતે દોડી આવ્યા હતા.વડોદરા ક્રાઈમ બ્રાન્ચ અને સ્થાનિક પોલીસ મથકોની ટીમોને એલર્ટ મોડ પર મૂકી દેવામાં આવી છે.શહેરના એક્ઝિટ પોઈન્ટ્સ, રેલવે સ્ટેશન, બસ સ્ટેન્ડ અને હાઈવે પર સઘન નાકાબંધી અને વાહન ચેકિંગ હાથ ધરવામાં આવ્યું છે.આરોપીના સંભવિત આશ્રયસ્થાનો અને સંપર્કોની વિગતો મેળવી તેને ફરી ઝડપી લેવા માટે અલગ-અલગ ટીમો રવાના કરવામાં આવી છે.
આ પણ વાંચો: Gandhinagar: ગુજરાત પોલીસ ભરતી અંગે મોટો નિર્ણય; માજી અગ્નિવીરોને લેખિત પરીક્ષામાંથી સંપૂર્ણ મુક્તિ
