વડોદરા શહેરમાં નવરાત્રી મહોત્સવ પૂર્વે બજરંગ દળ દ્વારા વિધર્મી મુક્ત નવરાત્રીની માંગ સાથે વિરોધનો સૂર બુલંદ કરવામાં આવ્યો છે. બજરંગ દળના હોદ્દેદારો અને મોટી સંખ્યામાં કાર્યકરોએ એકઠા થઈ વડોદરા પોલીસ કમિશનરને સત્તાવાર રીતે આવેદનપત્ર પાઠવ્યું હતું. તેમણે આવેદનપત્રમાં ગરબા ગ્રાઉન્ડ પર વિધર્મીઓને પ્રવેશ ન આપવા માટે આયોજકો અને પોલીસ તંત્ર દ્વારા કડક આદેશો જારી કરવા રજૂઆત કરી હતી.
"માતા-બહેનોને ફસાવવાનો કારસો"
પોલીસ કમિશનરને રજૂઆત કરતી વખતે બજરંગ દળના નેતાઓએ ગંભીર આરોપ લગાવ્યો હતો કે પ્રાચીન અને અર્વાચીન ગરબા મહોત્સવ દરમિયાન વિધર્મીઓ ગરબા મેદાનમાં પ્રવેશ કરીને હિન્દુ માતા-બહેનોને ફસાવવાનું કામ કરે છે. આ પ્રકારની પ્રવૃત્તિઓ રોકવા માટે તમામ ગરબા સ્થળો પર આયોજકો અને પોલીસ તંત્ર દ્વારા આધારકાર્ડ કે ઓળખપત્રોની કડક તપાસ કર્યા બાદ જ ગરબા ગ્રાઉન્ડમાં પ્રવેશ આપવામાં આવે તેવી માંગણી કરવામાં આવી છે.