વડોદરાના સૌથી વ્યસ્ત ગણાતા ફતેગંજ બ્રિજ પર પુરપાટ ઝડપે આવી રહેલા એક ભારેભરખમ ડમ્પરે એકસાથે 3 કારને અડફેટે લેતા અકસ્માતોની હારમાળા સર્જાઈ હતી. આ અકસ્માતને પગલે સ્થાનિકોના જીવ તાળવે ચોંટી ગયા હતા અને બ્રિજ પર ટ્રાફિક વ્યવસ્થા સંપૂર્ણપણે ખોરવાઈ ગઈ હતી.
અચાનક બ્રેક વાગતાં જ સર્જાયો અકસ્માત
પ્રાપ્ત વિગતો અનુસાર, ફતેગંજ બ્રિજ પરથી વાહનો પસાર થઈ રહ્યા હતા ત્યારે અચાનક આગળ જઈ રહેલા એક વાહનના ચાલકે બ્રેક મારી દીધી હતી. જેના કારણે પાછળ આવી રહેલા વાહનો એકબીજા સાથે ધડાકાભેર અથડાયા હતા. આ દરમિયાન પાછળથી આવી રહેલા એક ડમ્પરે પણ કાબૂ ગુમાવતા આગળની ત્રણેય કારને જોરદાર ટક્કર મારી દીધી હતી. અકસ્માત એટલો સ્પીડમાં હતો કે ત્રણેય કારને મોટું નુકસાન પહોંચ્યું છે. જો કે, સદનસીબે આ સમગ્ર ઘટનામાં કોઈ જાનહાનિના સમાચાર નથી, જે મોટી રાહતની વાત છે. ઘટનાને પગલે સુરક્ષાના ભાગરૂપે ફતેગંજ બ્રિજને એક તરફથી વાહનવ્યવહાર માટે તાત્કાલિક બંધ કરી દેવામાં આવ્યો હતો.