વડોદરા જિલ્લાના સાવલી તાલુકાના લામડાપુરા ગામે કાયદો અને વ્યવસ્થાની સ્થિતિ વણસાવતી એક ગંભીર ઘટના સામે આવી છે. અહીં ગામના સરપંચના પુત્રએ સામાન્ય વિવાદમાં કાયદો હાથમાં લઈને ભાડૂતી ગુંડાઓ બોલાવી ભારે તોડફોડ મચાવી હતી. આ ગુંડાગીરીના પગલે સ્થાનિક વિસ્તારમાં ચકચાર મચી ગઈ હતી. જો કે, ઘટનાની ગંભીરતાને ધ્યાને લઈને મંજુસર પોલીસે તાત્કાલિક એક્શન મોડમાં આવીને મુખ્ય સૂત્રધાર સહિતના તત્વો સામે કડક કાયદાકીય સિકંજો કસ્યો છે.
આર્મ્સ એક્ટ સહિતની ગંભીર કલમો હેઠળ ગુનો દાખલ
સરપંચ પુત્ર દ્વારા હથિયારો સાથે આવેલા ભાડૂતી ગુંડાઓનો સહારો લઈને આતંક મચાવવામાં આવ્યો હોવાની ફરિયાદ મળતા જ મંજુસર પોલીસ હરકતમાં આવી હતી. પોલીસે આ મામલે આર્મ્સ એક્ટ (હથિયાર ધારો) તેમજ ભારતીય ન્યાય સંહિતાની વિવિધ ગંભીર કલમો હેઠળ આઠ ઈસમો સામે ગુનો નોંધી દીધો હતો. પોલીસે અલગ-અલગ ટીમો બનાવીને ગણતરીના કલાકોમાં જ તમામ 8 આરોપીઓને દબોચી લીધા હતા અને લોકઅપ ભેગા કરી દીધા હતા.
