Vadodara News : વાહનચાલકોને ક્યારે મળશે રાહત!, વડોદરા-સુરત હાઈવે પર 15 કિમીનો ટ્રાફિક જામ

વડોદરા-સુરત નેશનલ હાઈવે પર વાહનચાલકો માટે માથાનો દુખાવો બન્યો છે. જંબુઆ બ્રિજ પાસેના ખાડા અને રોડ સાંકડો હોવાને કારણે અહીં છેલ્લા ઘણા સમયથી ટ્રાફિક જામની સમસ્યા વિકટ બની છે. આજે આ સમસ્યાએ ભયાવહ સ્વરૂપ ધારણ કરતાં હાઈવે પર 10 થી 15 કિલોમીટર લાંબો ટ્રાફિક જામ સર્જાયો હતો. ટ્રાફિક જામના ડ્રોન વીડિયો પણ સામે આવ્યા છે જેમાં વાહનોની લાંબી કતારો સ્પષ્ટપણે જોવા મળે છે.

જંબુઆ બ્રિજ પર ખાડાના કારણે ટ્રાફિક જામ સર્જાયો

મળતી જાણકારી અનુસાર, જંબુઆ બ્રિજ પરના મોટા ખાડાઓને કારણે વાહનચાલકોને ધીમે ચાલવાની ફરજ પડી રહી છે. વળી, આ વિસ્તારમાં રસ્તો સાંકડો હોવાને કારણે પણ વાહનોની ગતિ ધીમી પડે છે અને ટ્રાફિકનું ભારણ વધે છે. ખાસ કરીને ભારે વાહનોની અવરજવર વધુ હોવાથી પરિસ્થિતિ વધુ ગંભીર બને છે. આજના ટ્રાફિક જામને કારણે વાહનચાલકો કલાકો સુધી ફસાયેલા રહ્યા હતા. ગરમી અને બફારામાં લોકોને હાલાકીનો સામનો કરવો પડ્યો હતો. ઘણા મુસાફરોને પોતાના ગંતવ્ય સ્થાને પહોંચવામાં વિલંબ થયો હતો. આ ટ્રાફિક જામની અસર આસપાસના વૈકલ્પિક માર્ગો પર પણ જોવા મળી હતી. જ્યાં પણ વાહનોની ભીડ જામી હતી.

ભયાવહ ટ્રાફિક જામથી વાહનચાલકો પરેશાન

નેશનલ હાઈવે ઓથોરિટી ઓફ ઇન્ડિયા (NHAI) દ્વારા આ સમસ્યાના કાયમી નિરાકરણ માટે તાત્કાલિક પગલાં લેવામાં આવે તે જરૂરી છે. જંબુઆ બ્રિજ પરના ખાડાઓનું સમારકામ અને જો શક્ય હોય તો રોડ પહોળો કરવાની કામગીરી હાથ ધરવામાં આવે તેવી વાહનચાલકો અને સ્થાનિકો દ્વારા માંગ કરવામાં આવી રહી છે. આ સમસ્યાનું નિરાકરણ નહીં આવે તો આગામી દિવસોમાં પણ આવી જ પરિસ્થિતિનો સામનો કરવો પડી શકે છે.