વડોદરા શહેરના ખંડેરાવ માર્કેટ પાસે સવારે પાંચ વાગ્યે એક ગમખ્વાર માર્ગ અકસ્માત સર્જાયો હતો.પુરપાટ ઝડપે આવી રહેલી એક કારની અડફેટે આવી જતાં મધુબેન નામની મહિલાનું ઘટનાસ્થળે જ કમકમાટીભર્યું મોત નીપજ્યું હતું.આ મામલે રાવપુરા પોલીસે તાત્કાલિક કાર્યવાહી કરીને કારમાં સવાર બે યુવકોની ધરપકડ કરી કાયદેસરની તપાસ હાથ ધરી છે.
મધુબેનનું ઘટનાસ્થળે જ કમકમાટીભર્યું મોત નીપજ્યું
વડોદરાના ખંડેરાવ માર્કેટ પાસે વહેલી સવારે પાંચ વાગ્યાના સમયે મધુબેન પોતાના પુત્ર સુનિલ માળી સાથે મોપેડ પર સવાર થઈને ફૂલ ખરીદવા માટે જઈ રહ્યા હતા. બંને જણા જ્યારે પોતાના નિત્યક્રમ મુજબ માર્ગ પરથી પસાર થઈ રહ્યા હતા. ત્યારે પાછળથી પૂરપાટ ઝડપે દોડી આવેલી એક બેફામ કારે તેમના મોપેડને જોરદાર ટક્કર મારી દીધી હતી.અકસ્માત એટલો ખતરનાક હતો કે કારની ટક્કર વાગતાં જ મોપેડ પરથી મધુબેન નીચે પટકાયા હતા.આ અકસ્માતના કારણે મધુબેનનું ઘટનાસ્થળે જ કમકમાટીભર્યું મોત નીપજ્યું હતું.વહેલી સવારે સર્જાયેલા આ ગમખ્વાર અકસ્માતને પગલે સમગ્ર વિસ્તારમાં ભારે અરેરાટી વ્યાપી ગઈ હતી.