Valsadમાં ધામણી-કપરાડા બ્રિજ પર પાણી ભરાતા લોકોને હાલાકી, વાહનચાલકો ફસાયા

વલસાડ જિલ્લામાં ભારે વરસાદના કારણે ધરમપુર તાલુકાના ધામણી અને કપરાડાના કુંડાને જોડતો લો-લેવલ બ્રિજ ફરી એકવાર પાણીમાં ગરકાવ થયો હતો. આ બ્રિજ પર પાણી ફરી વળતા વાહનચાલકો ભારે મુશ્કેલીમાં મુકાયા હતા. તેમના વાહનો ફસાયા હોવાના દ્રશ્યો સામે આવ્યા હતા. આ બ્રિજની સમસ્યા નવી નથી. ચોમાસામાં લગભગ ચાર મહિના સુધી આ બ્રિજ પાણીમાં ડૂબેલો રહેતો હોય છે. જેના કારણે સ્થાનિક લોકોને અવરજવરમાં ભારે હાલાકી ભોગવવી પડતી હોય છે. 

બ્રિજ પર પાણીનો પ્રવાહ વધતા વાહનચાલકો અટવાયા

જોકે આ સમસ્યાના કાયમી ઉકેલ માટે એક નવો બ્રિજ બનાવવામાં આવી રહ્યો છે. પરંતુ તે બ્રિજનું કામ હજુ પૂરૂ થયું નથી. નવો બ્રિજ ન બને ત્યાં સુધી લોકોને આ જૂના અને જોખમી બ્રિજનો ઉપયોગ કરવાની ફરજ પડી હતી. આજે પણ બ્રિજ પર પાણીનો પ્રવાહ વધતા કેટલાક વાહનચાલકો ત્યાંથી પસાર થવાનો પ્રયાસ કરી રહ્યા હતા. પરંતુ પાણીના જોરદાર પ્રવાહને કારણે તેમના વાહનો બ્રિજ પર જ ફસાયા હતા. આ પરિસ્થિતિએ સ્થાનિક લોકોની મુશ્કેલીમાં વધારો કર્યો હતો.

સરકાર નવા બ્રિજની કામગીરી ઝડપી પૂરી કરે તેવી સ્થાનિકોની માંગ 

 સ્થાનિકોની માંગ હતી કે નવા બ્રિજનું કામ તાત્કાલિક પૂર્ણ કરવામાં આવે. જેથી આ લો-લેવલ બ્રિજની સમસ્યામાંથી સ્થાનિકોને છુટકારો મળે. પાણીના પ્રવાહમાં પસાર થવું જોખમી બન્યું છે અને તેનાથી કોઈ મોટી દુર્ઘટના પણ સર્જાઈ શકે છે. સરકાર આ મામલે ગંભીરતાથી ધ્યાન આપે અને તાત્કાલિક યોગ્ય પગલાં ભરવા જરૂરી છે.