લઠ્ઠાકાંડ બાદ ગુજરાતમાં દારૂબંધીને લઈને ગરમાયેલા માહોલ વચ્ચે વલસાડના નારગોલમાં દારૂબંધી હળવી કરવાની માંગ ઉઠી છે. નારગોલના મહિલા સરપંચ સ્વીટી ભંડારીએ મુખ્યમંત્રીને પત્ર લખીને દારૂબંધી હળવી કરવા રજૂઆત કરી છે. દારૂબંધી હળવી કરવાથી રોજગારીની તકો વધશે અને લઠ્ઠાકાંડ જેવા બનાવો અટકાવવામાં મદદ મળી શકે તેવી રજૂઆત કરવામાં આવી છે.
મુખ્યમંત્રીને પત્ર લખી રજૂઆત
નારગોલના મહિલા સરપંચ સ્વીટી ભંડારીએ મુખ્યમંત્રીને પત્ર લખીને દારૂબંધી હળવી કરવાની માંગ કરી છે. લઠ્ઠાકાંડ બાદ દારૂબંધીના કાયદા અને તેની અમલવારી અંગે ચર્ચા ચાલી રહી છે ત્યારે આ માંગ સામે આવતા મુદ્દો વધુ ચર્ચામાં આવ્યો છે.
મહારાષ્ટ્ર અને દમણ વચ્ચે આવેલું છે નારગોલ
નારગોલ ગામ ભૌગોલિક રીતે દારૂની છૂટ ધરાવતા મહારાષ્ટ્ર અને દમણની વચ્ચે આવેલું છે. જેના કારણે નારગોલમાં દારૂબંધીની નીતિને લઈને સ્થાનિક સ્તરે અલગ પ્રકારની પરિસ્થિતિ હોવાનો સરપંચે રજૂઆતમાં ઉલ્લેખ કર્યો છે.
પર્યટન વિકાસ માટે દારૂબંધી હળવી કરવાની દલીલ
નારગોલના દરિયા કિનારે દેશ-વિદેશમાંથી મોટી સંખ્યામાં પર્યટકો આવે છે. દારૂબંધી હળવી કરવામાં આવે તો નારગોલમાં પર્યટનને વેગ મળી શકે અને રોજગારીની નવી તકો ઊભી થઈ શકે તેવી દલીલ સરપંચ દ્વારા કરવામાં આવી છે.
લઠ્ઠાકાંડ જેવા બનાવો અટકાવવાનો તર્ક
દારૂબંધી હળવી કરવાથી ગેરકાયદે દારૂના વેપાર પર અંકુશ આવી શકે અને લઠ્ઠાકાંડ જેવા બનાવો અટકાવવામાં મદદ મળી શકે તેવી પણ રજૂઆત કરવામાં આવી છે. જોકે, દારૂબંધી હળવી કરવાની આ માંગને લઈને સ્થાનિક સ્તરે ચર્ચા તેજ બની છે.
પૂર્વ સરપંચે પણ માંગને આપ્યું સમર્થન
નારગોલના ભૂતપૂર્વ સરપંચ યતીન ભંડારીએ પણ વર્તમાન સરપંચ સ્વીટી ભંડારીની માંગને સમર્થન આપ્યું છે. તેમણે પણ નારગોલમાં દારૂબંધી હળવી કરવાની માંગ કરી છે. જેના કારણે આ મુદ્દો હવે સ્થાનિક રાજકારણ અને જાહેર ચર્ચાનું કેન્દ્ર બન્યો છે.
લઠ્ઠાકાંડની તપાસ વચ્ચે મુદ્દો ગરમાયો
એક તરફ લઠ્ઠાકાંડની તપાસનો ધમધમાટ ચાલી રહ્યો છે અને બીજી તરફ દારૂબંધી હળવી કરવાની માંગ સામે આવી છે. સરપંચ દ્વારા મુખ્યમંત્રીને લખાયેલા પત્ર બાદ આ મુદ્દે હવે સરકાર શું વલણ અપનાવે છે તેના પર નજર રહેશે.
આ પણ વાંચો : Nepal Flood : ભયાનક પૂર વચ્ચે એકલું ઘર અડીખમ, પાણીમાં આખું ગામ તણાયું છતાં મકાન બચી ગયું જુઓ ભયાનક Video
