ગુજરાતમાં પ્રિ-મોન્સૂન એક્ટિવિટી બાદ હવે ઓફિશિયલ ચોમાસાએ બરાબરની જમાવટ કરી દીધી છે. અમદાવાદ સ્થિત હવામાન કેન્દ્રના ડાયરેક્ટરના જણાવ્યા મુજબ, બંગાળની ખાડી અને અરબી સમુદ્રમાં સર્જાયેલી સિસ્ટમના કારણે આગામી ૨ થી ૩ દિવસ રાજ્ય માટે ખૂબ મહત્વના છે. આજે વહેલી સવારથી જ દક્ષિણ ગુજરાતના ડાંગ અને વલસાડના અંતરિયાળ વિસ્તારોમાં ધીમીધારે વરસાદ શરૂ થઈ ગયો છે, જે આગામી કલાકોમાં ભારે વરસાદમાં પરિવર્તિત થઈ શકે છે.
યલો એલર્ટ વચ્ચે વહીવટી તંત્ર સજ્જ
હવામાન વિભાગે સુરત, તાપી, નવસારી અને ડાંગ જિલ્લા માટે 'યલો એલર્ટ' જાહેર કર્યું છે. આ વિસ્તારોમાં નીચાણવાળા ભાગોમાં પાણી ભરાવાની સંભાવનાને પગલે સ્થાનિક કલેક્ટર અને ડિઝાસ્ટર મેનેજમેન્ટની ટીમોને એલર્ટ પર મૂકી દેવામાં આવી છે. કેન્દ્રશાસિત પ્રદેશ દમણ અને દાદરા નગરહવેલીમાં પણ સહેલાણીઓને દરિયાકાંઠાથી દૂર રહેવા જણાવાયું છે. પવનની ગતિ 40 થી 50 કિલોમીટર પ્રતિ કલાક રહેવાની હોવાથી કાચા મકાનો, હોર્ડિંગ્સ અને વૃક્ષો ધરાશાયી થવાની ઘટનાઓ સામે સાવચેતી રાખવા અપીલ કરાઈ છે.
સૌરાષ્ટ્રના બંદરો પર ભયસૂચક સિગ્નલ
બીજી તરફ, સૌરાષ્ટ્રના ગીર સોમનાથ, દીવ અને જાફરાબાદ સહિતના દરિયાકાંઠે કરંટ જોવા મળી રહ્યો છે. અમરેલી અને ભાવનગર જિલ્લામાં વાવણી બાદ હવે પાક માટે આશીર્વાદરૂપ ગણાતો ભારે વરસાદ પડવાની સંભાવના છે. મધ્ય ગુજરાતના આદિવાસી બેલ્ટ ગણાતા છોટાઉદેપુર અને નર્મદાના જંગલ વિસ્તારોમાં પણ ધોધમાર વરસાદની આગાહી છે. અમદાવાદની જનતાને અસહ્ય બફારામાંથી મુક્તિ મળશે, કારણ કે શહેરમાં આગામી 24 કલાક દરમિયાન ગાજવીજ સાથે મધ્યમ વરસાદી ઝાપટાં પડવાની પૂરેપૂરી શક્યતા છે.
આ પણ વાંચો: Vadodara: રક્ષામંત્રી રાજનાથ સિંહ વડોદરા પહોંચ્યા, ડિફેન્સ સેમિનારમાં આપશે હાજરી
