છોટાઉદેપુર જિલ્લામાં છેલ્લા ઘણા દિવસોથી તાપમાનનો પારો ઊંચો રહેવાના કારણે નાગરિકો અસહ્ય ગરમી અને બફારાથી ત્રાહિમામ પોકારી ઉઠ્યા હતા. આકાશમાં વાદળો બંધાતા હોવા છતાં વરસાદ ન પડવાને કારણે ખેડૂતો પણ ચિંતાતુર બન્યા હતા. જો કે, આજે વહેલી સવારથી જ કુદરતે કરવટ બદલી છે. છોટાઉદેપુર શહેર સહિત જિલ્લાના જુદા જુદા તાલુકા મથકો અને અંતરિયાળ ગ્રામ્ય વિસ્તારોમાં વહેલી સવારના 5:00 વાગ્યાથી જ મેઘરાજાની ધીમીધારે બેટિંગ શરૂ થઈ ગઈ છે.
જનજીવન પર ચોમાસાની પ્રથમ અસર
ધોધમાર વરસાદ પડવાને બદલે સતત ઝરમર અને ધીમીધારે વરસી રહેલા વરસાદે સમગ્ર પંથકને ભીંજવી દીધો છે. વહેલી સવારથી શરૂ થયેલી આ મેઘમહેરના કારણે સામાન્ય જનજીવન પર તેની સીધી અસર જોવા મળી છે. સવારના સમયે શાકભાજી માર્કેટ, દૂધની ડેરીઓ અને નોકરી-ધંધાર્થે જતા લોકોએ રેઇનકોટ અને 667છત્રીનો આશરો લેવો પડ્યો હતો. રસ્તાઓ પર પાણી વહેતા થવાના કારણે વાહનોની ગતિ ધીમી પડી હતી. જો કે, આ વરસાદના કારણે વાતાવરણ એટલું આહલાદક અને ઠંડુગાર બની ગયું છે કે લોકો ગરમીના દિવસો ભૂલીને ચા-નાસ્તાની લારીઓ પર ચોમાસાની મજા માણતા નજરે પડ્યા હતા.
ધરતીપુત્રો માટે આશીર્વાદ સમાન વરસાદ
છોટાઉદેપુર જિલ્લો મુખ્યત્વે ખેતી પર નિર્ભર હોવાથી આ વરસાદ સ્થાનિક અર્થતંત્ર માટે બુસ્ટર ડોઝ સમાન સાબિત થશે. કપાસ, મકાઈ, તુવેર અને ડાંગરના પાક માટે આ ધીમીધારનો વરસાદ ખૂબ જ ગુણકારી માનવામાં આવે છે કારણ કે આવો વરસાદ જમીનમાં ઉતરે છે અને જમીનને નરમ બનાવે છે. લાંબા સમયની ચિંતાજનક રાહ જોયા બાદ મેઘરાજાએ પધરામણી કરતાં જ જગતનો તાત ખુશખુશાલ થઈ ગયો છે અને ખેતરોમાં ખાતર તેમજ બિયારણની વ્યવસ્થા કરવા માટે દોડધામ શરૂ કરી દીધી છે. જો આગામી બે દિવસ આ જ રીતે વરસાદ ચાલુ રહેશે, તો જિલ્લામાં સાર્વત્રિક ખરીફ વાવણીના શ્રીગણેશ થઈ જશે.
