ગુજરાતમાં અસહ્ય ગરમી અને બફારા વચ્ચે લોકો જેની આતુરતાથી રાહ જોઈ રહ્યા છે તે ચોમાસાને લઈને હવામાન નિષ્ણાંત અંબાલાલ પટેલે મોટી આગાહી કરી છે. અંબાલાલ પટેલના જણાવ્યા અનુસાર, રાજ્યમાં હજી ચોમાસા પૂર્વે આકરી ગરમીનો સામનો કરવો પડશે. પ્રિ-મોન્સુન એક્ટિવિટીનો વરસાદ ન આવવાના કારણે આગામી દિવસોમાં તાપમાનનો પારો ઊંચકાશે. જોકે, રાહતના સમાચાર એ છે કે જૂન મહિનાના અંત સુધીમાં ગુજરાતમાં વિધિવત ચોમાસાની એન્ટ્રી થઈ જશે અને જુલાઈમાં મેઘરાજા ધમધોકાર બેટિંગ કરશે.
લોકોને આકરી ગરમીનો સામનો કરવો પડશે
અંબાલાલ પટેલની આગાહી મુજબ, 8 જૂનની આસપાસ દરિયામાં પવનો બદલાશે. ઉત્તર ગુજરાત, મધ્ય ગુજરાત અને પૂર્વ ગુજરાતના ભાગોમાં તાપમાન 42 થી 43 ડિગ્રી સુધી પહોંચવાની સંભાવના છે, જ્યારે લઘુત્તમ તાપમાન ૨૭ થી ૩૦ ડિગ્રી રહેશે. આ ઉપરાંત દક્ષિણ ગુજરાતમાં તાપમાન 35 ડિગ્રી આસપાસ, જામનગરમાં 35-36 ડિગ્રી અને દ્વારકા સહિતના દરિયાકાંઠાના વિસ્તારોમાં તાપમાન 33 ડિગ્રી આસપાસ રહેવાની શક્યતા છે. 16 જૂન સુધી દરિયા કિનારાના ભાગોમાં ઓછો વરસાદ જોવા મળી શકે છે.
