નવસારી જિલ્લામાં આજે વહેલી સવારથી જ હવામાન વિભાગની આગાહી મુજબ મેઘરાજાએ તોફાની ઇનિંગ શરૂ કરી દીધી છે. જિલ્લાના મુખ્ય વ્યાપારી મથકો એવા ગણદેવી, બીલીમોરા અને ચીખલી પંથકમાં સવારના સમયે કાળાડિબાંગ વાદળોની ફોજ વચ્ચે ધોધમાર વરસાદ તૂટી પડ્યો હતો. માત્ર થોડા જ કલાકના ધોધમાર વરસાદના કારણે નવસારીના મુખ્ય માર્ગો તેમજ નીચાણવાળા વિસ્તારોમાં ઘૂંટણસમા પાણી ભરાઈ ગયા હતા, જેના કારણે સવારના સમયે નોકરી-ધંધે જતા વાહનચાલકો અને મુસાફરો ભારે મુશ્કેલીમાં મુકાયા હતા.
કેરીનો પાક જોખમમાં
નવસારી અને ગણદેવી પંથક આફુસ કેરીના ઉત્પાદન માટે આખા દેશમાં જાણીતો છે. આ વર્ષે પહેલેથી જ વાતાવરણની અનિયમિતતાને કારણે કેરીનો પાક ઓછો ઉતર્યો છે, તેવામાં આજના તોફાની વરસાદે બાગાયતદારો અને ખેડૂતોની કમર તોડી નાખી છે. વરસાદ અને તીવ્ર પવનના કારણે આંબા પર બચેલી અને તૈયાર થવા આવેલી કેરીઓ ખરી પડવાની તેમજ તેમાં કાળી મસી અથવા બગાડ થવાની મોટી ભીતિ સેવાઈ રહી છે. આ કમોસમી માવઠાને કારણે જગતનો તાત આર્થિક પાયમાલીના આરે આવીને ઊભો રહી ગયો છે.