વડોદરા જિલ્લામાં ચોમાસાના વિધિવત આગમનની આતુરતાપૂર્વક રાહ જોવામાં આવી રહી હતી, જેનો અંત હવે આવી ગયો છે. જિલ્લાના બે મહત્વના તાલુકા મથકો વાઘોડિયા અને સાવલીમાં મેઘરાજાએ અલગ-અલગ સ્વરૂપે ધમાકેદાર હાજરી નોંધાવી છે. વાઘોડિયા પંથકમાં ગઈકાલ રાતથી જ આકાશમાં કાળાડિબાંગ વાદળોના ગડગડાટ સાથે ધોધમાર વરસાદ તૂટી પડ્યો હતો. આ ઓવરનાઇટ વરસાદ એટલો પ્રચંડ હતો કે વહેલી સવાર સુધી તેની ગતિ ધીમી પડી ન હતી, જેના લીધે તાલુકાના નીચાણવાળા વિસ્તારો, મુખ્ય બજારો અને કેટલીક રહેણાંક સોસાયટીઓમાં ઘૂંટણસમા પાણી ભરાઈ ગયા હતા. જો કે, સવારના સમયે પણ મેઘરાજાની બેટિંગ ચાલુ રહેતા વાતાવરણ એકદમ ઠંડુગાર બની ગયું છે.
સાવલીમાં ઝરમર વરસાદથી બફારાનો અંત
બીજી તરફ, વડોદરાના સાવલી તાલુકામાં સવારથી જ ચોમાસાનો અદ્ભુત માહોલ જોવા મળ્યો હતો. સમગ્ર તાલુકામાં સવારથી જ સૂર્યનારાયણ વાદળોની પાછળ છુપાઈ ગયા હતા અને કાળાડિબાંગ વાદળોની ઘેરાબંધી વચ્ચે ધીમીધારે ઝરમર વરસાદની શરૂઆત થઈ હતી. સાવલીમાં છેલ્લા કેટલાક દિવસોથી તાપમાન ઊંચું રહેવાના કારણે લોકો અસહ્ય ઉકળાટ અને પરસેવાથી પરેશાન હતા, પરંતુ આ હળવા વરસાદે જાદુઈ અસર કરી છે અને ગરમીનો પારો ગગડતા લોકોને એસી-કુલરમાંથી મુક્તિ મળી છે.
