ઈરાન-ઈઝરાયલ યુદ્ધના વધતા તણાવ વચ્ચે તેની અસર હવે ગુજરાતના ઔદ્યોગિક ક્ષેત્ર પર પણ જોવા મળી રહી છે. રાજ્યમાં ઉદ્યોગોમાં વપરાતા ગેસના પુરવઠાને લઈને સરકારે મહત્વનો નિર્ણય લીધો છે. મળતી માહિતી મુજબ ઔદ્યોગિક ક્ષેત્રે વપરાતા ગેસના ઉપયોગ પર 50 ટકા સુધી મર્યાદા નક્કી કરવામાં આવી છે. સરકાર દ્વારા ઉદ્યોગોને સૂચના આપવામાં આવી છે કે તેઓ ગેસનો વપરાશ નિર્ધારિત 50 ટકાની મર્યાદામાં જ કરે.
તમામ ઉદ્યોગોને સરકારે મૌખિક સુચના આપી
યુદ્ધની પરિસ્થિતિને ધ્યાનમાં રાખીને ગેસ પુરવઠા પર દબાણ વધવાની શક્યતા છે, જેથી ભવિષ્યમાં તંગી ન સર્જાય તે માટે આ નિર્ણય લેવામાં આવ્યો હોવાનું જણાવવામાં આવી રહ્યું છે. સૂત્રો દ્વારા મળતી માહિતી મુજબ રાજ્ય સરકાર દ્વારા તમામ ઉદ્યોગોને આ અંગે મૌખિક સૂચના આપવામાં આવી છે. ઉદ્યોગોને ગેસનો વપરાશ સંયમપૂર્વક કરવાની તેમજ જરૂરી આયોજન કરવાની સલાહ આપવામાં આવી છે. મુખ્ય હેતુ એ છે કે ગેસની અછત વચ્ચે પણ ઔદ્યોગિક ઉત્પાદન સંપૂર્ણપણે બંધ ન થાય અને ઉત્પાદન પ્રક્રિયા ચાલુ રહી શકે.