ગુજરાતના મોરબી જિલ્લામાંથી એક અત્યંત ચિંતાજનક અને ચોંકાવનારા સમાચાર સામે આવ્યા છે. મૂળ મોરબીનો રહેવાસી અને 22 વર્ષીય યુવાન સાહિલ માજોઠી હાલ યુક્રેનના લવીવ શહેરમાં આવેલા ડિટેન્શન સેન્ટરમાં કેદ છે. સાહિલ રશિયામાં અભ્યાસ કરવા માટે ગયો હતો, પરંતુ ત્યાં તેને કથિત રીતે ડ્રગ્સ કેસમાં ફસાવી દેવામાં આવ્યો હતો અને ત્યારબાદ તેને જબરજસ્તીથી રશિયન આર્મીમાં જોડાવાની ફરજ પાડીને રશિયા-યુક્રેન યુદ્ધના ભીષણ મોરચે મોકલી દેવામાં આવ્યો હતો. આ ભયાનક પરિસ્થિતિમાંથી કંટાળીને સાહિલે યુક્રેન સેના સમક્ષ પોતાની શરણાગતિ સ્વીકારી લીધી હતી, ત્યારથી તે યુક્રેન કસ્ટડીમાં છે અને તેનો પરિવાર તેના પરત ફરવા માટે ભારત સરકાર પાસે મદદની ગુહાર લગાવી રહ્યો છે.
યુક્રેન સરકાર સાહિલને મુક્ત કરવા તૈયાર
આ કેસમાં એક મોટી અને આશાજનક માહિતી સામે આવી છે કે સાહિલની મુક્તિ માટે યુક્રેનમાં કાનૂની લડત લડી રહેલા વકીલ દીપા જોસેફે ત્યાંના ઉચ્ચ સૈન્ય અધિકારીઓ સાથે રૂબરૂ મુલાકાત કરી છે. વકીલના જણાવ્યા મુજબ, યુક્રેન સરકાર સાહિલને મુક્ત કરવા માટે સંપૂર્ણપણે તૈયાર છે, પરંતુ તેના માટે ભારતીય દૂતાવાસ તરફથી એક સત્તાવાર ઈમેલ કે પત્ર વ્યવહાર હોવો અનિવાર્ય છે. દુઃખની વાત એ છે કે છેલ્લા એક વર્ષથી યુક્રેન સરકારને ભારતીય દૂતાવાસ તરફથી કોઈ સત્તાવાર પ્રત્યુત્તર કે જવાબ મળ્યો નથી, જેના કારણે એક માસૂમ યુવાનનો મુક્તિનો માર્ગ અટક્યો છે.