છેલ્લા કેટલાક સમયથી રાજ્યના મહાનગરોમાં સિરપના નામે યુવાઓને નશાના રવાડે ચડાવવાનું જાણે કે કૌભાંડ ચાલતુ હોય તેવો ઘાટ સર્જાયો છે. રાજકોટ હોય કે ભાવનગર, કે હોય વડોદરા મહાનગરોમાં બેફામ ખુલ્લેઆમ, સિરપના નામે નશાના વેપારનું ષડયંત્ર ચાલી રહ્યું છે. યુવાઓ આવી સિરપના રવાડે ચડીને નશો કરે છે અને બરબાદીના રસ્તે ધકેલાય છે. ત્યારે વડોદરામાં દવાની આડમાં નશીલી કફ સીરપ વેચવાના કૌભાંડનો પર્દાફાશ થયો છે.
મળતી માહિતી મુજબ, SOGએ બાતમીના આધારે રતિલાલ પાર્કમાં મકાન નંબર A/50 માં દરોડા પાડ્યા હતા. દરોડા દરમિયાન દવાની આડમાં નસીલી કફ સીરપ વેચવાનું કૌભાંડનો પર્દાફાશ કરવામાં આવ્યો છે. વિપુલ રાજપૂતના મકાનમાંથી કુલ 2570 નંગ કોડિન કફ સીરપની બોટલનો જથ્થો મળી આવ્યો છે. એસ ઓ જી પોલીસે ફૂડ એન્ડ ડ્રગ્સ વિભાગ તેમજ એફએસએલની મદદ લીધી છે. નશાકારક કોડીન કફ સીરપનો 5 લાખ 78 હજારનો જથ્થો સિઝ કરવાની કાર્યવાહી હાથ ધરવામાં આવી છે.
