- ચોમાસામાં મચ્છરનો ઉપદ્રવ વધે છે
- ચોમાસામાં મચ્છર તમામ પ્રકારના ચેપ ફેલાવી શકે છે
- તેથી ચોમાસા દરમિયાન સાવચેતી રાખવી જરૂરી છે
ઘણા બધા લોકો અથવા તો સમગ્ર પ્રકૃતિ ચોમાસા વરસાદની ખૂબ જ ઉત્સાહથી રાહ જુએ છે. મોટાભાગના લોકોને હવામાનનો આ ફેરફાર ખૂબ જ સરસ અને સુંદર લાગે છે. ગરમીથી રાહત મેળવવા સિવાય આ ઋતુ બાળકોથી લઈને વૃદ્ધો સુધી દરેકને તાજગી આપે છે. પરંતુ તેની કેટલીક સમસ્યાઓના કારણે ચોમાસાને ડોકટરોની સીઝન પણ કહેવામાં આવે છે.
વરસાદની ઋતુ પોતાની સાથે અનેક નાની-મોટી બીમારીઓ, વાયરસ અને ઈન્ફેક્શન લઈને આવે છે. આ મચ્છર તમામ પ્રકારના ચેપ ફેલાવી શકે છે. તેથી ચોમાસાનો સંપૂર્ણ આનંદ માણતી વખતે, તમારા પરિવારને સુરક્ષિત રાખવા માટે કેટલીક સાવચેતી રાખવી ખૂબ જ મહત્વપૂર્ણ છે.
રોગપ્રતિકારક શક્તિને નબળી પડે છે
ડોક્ટરના મતે ચોમાસું આપણી રોગપ્રતિકારક શક્તિને નબળી પાડે છે. જેના કારણે અનેક પ્રકારની બીમારીઓ થઈ શકે છે. આ સિઝનમાં પાણીજન્ય રોગો સૌથી વધુ જોવા મળે છે. વરસાદની ઋતુમાં વાયરસ ચેપી બની શકે છે અને તાવ, ફ્લૂ અને પેટની સમસ્યાઓનું કારણ બની શકે છે. વરસાદની ઋતુમાં સ્વસ્થ અને સુરક્ષિત રહેવા માટે, ચોમાસા દરમિયાન કેટલીક વિશેષ સાવચેતી રાખવી જોઈએ.
વરસાદની ઋતુમાં રાખો આ સાવચેતી
આરોગ્ય નિષ્ણાતો વરસાદની ઋતુમાં આ ખૂબ જ મહત્વપૂર્ણ સાવચેતીઓ રાખવાની ભલામણ કરે છે. તેને ફોલો કરીને તમે સ્વસ્થ અને સુરક્ષિત રહીને હવામાન અને વરસાદમાં થતા ફેરફારોનો આનંદ માણી શકો છો.
સ્વચ્છ અને ઉકાળેલું પાણી પીવો
ચોમાસા દરમિયાન પાણીના સ્ત્રોત દૂષિત થઈ શકે છે. જેના કારણે પાણીજન્ય રોગો થવાની સંભાવના વધી જાય છે. પેટની સમસ્યા અને તાવ આ સિઝનમાં સૌથી સામાન્ય સમસ્યા છે. તેથી, ઘરમાં પાણીનું ફિલ્ટર હોવું જરૂરી છે અથવા દરરોજ પીવા માટે પાણી પરંપરાગત રીતે ઉકાળી શકાય છે. આ સિવાય તમે જ્યારે પણ મુસાફરી કરો ત્યારે પીવાનું પાણી તમારી સાથે રાખો અથવા જરૂર જણાય તો સીલબંધ અને પેકેજ્ડ પાણી જ ખરીદો.
સ્ટ્રીટ ફૂડ અને જંક ફૂડ ટાળો
ઘણા ફેરિયાઓ લોકપ્રિય સ્ટ્રીટ ફૂડ અને તાજા કાપેલા ફળો ખુલ્લી હવામાં વેચે છે. આવા ખાદ્ય પદાર્થોથી દૂર રહેવું બેસ્ટ છે. કારણ કે ખુલ્લામાં રાખવાથી તેઓ હાનિકારક સુક્ષ્મજીવો પ્રત્યે વધુ સંવેદનશીલ હોય છે. તેના સેવનથી અનેક પ્રકારના ઈન્ફેક્શનનો ખતરો વધી જાય છે.
ઘરની આસપાસ પાણી જમા ન થવા દો
ચોમાસાની ઋતુમાં મચ્છરોની ઉત્પત્તિ એ સૌથી ખતરનાક સમસ્યા છે. ઘરની આસપાસ પાણીના ખાબોચિયા આવા જંતુઓ માટે ઉત્પત્તિની મોટી જગ્યા છે. તેથી હંમેશા ખાતરી રાખો કે પીવાના પાણીના વાસણ અથવા બોટલ ઢાંકેલી રાખો. પાણી ભરાયેલી જગ્યાને દૂર કરવાનો પ્રયાસ કરો.
ફળો અને શાકભાજીને કાળજીપૂર્વક સાફ કરો
બજારમાંથી ખરીદેલા ફળો અને શાકભાજીને ચોખ્ખા પાણીથી ધોવા જરૂરી છે. ફળો અને શાકભાજીની છાલ પર ઘણા પ્રકારના જંતુઓ લાગી શકે છે. વરસાદ દરમિયાન ફક્ત સ્વચ્છ અને તાજું ઘરે બનાવેલું ખોરાક જ ખાઓ.
પૂરતી ઊંઘ લો
મોડે સુધી કામ કરવાની અથવા સૂવાની ખરાબ ટેવો તમારી રોગપ્રતિકારક શક્તિને અવરોધે છે. ચોમાસા દરમિયાન ફ્લૂ અને શરદી જેવા લક્ષણોનું જોખમ વધી શકે છે. આ સિઝનમાં તમારી રોગપ્રતિકારક શક્તિ વધારવા અને સ્વસ્થ રહેવા માટે દરરોજ રાત્રે 6 થી 8 કલાકની ઊંઘ લો.
નિયમિત કસરત કરવાનું ભૂલશો નહીં
ચોમાસામાં ચાલવું, કૂદવું, યોગા, સાયકલ ચલાવવું કે દોડવું જેવી પ્રવૃત્તિઓમાં અડચણ આવી શકે છે, પણ આ ઋતુમાં તમારી કસરતની દિનચર્યામાં ઘટાડો ન થવા દો. વ્યાયામ માત્ર તમને ફિટ રહેવામાં મદદ કરે છે, સાથે સાથે તે તમારી રોગપ્રતિકારક શક્તિને પણ જાળવી રાખે છે. બ્લડ સર્કુલેશનને સુધારે છે અને તમારા શરીરને વાયરસ અને બેક્ટેરિયા સામે મજબૂત બનાવે છે.
હાથને યોગ્ય રીતે સાફ કરો
જ્યારે પણ તમે બહારથી પાછા ફરો ત્યારે, જમતા પહેલા અને શૌચાલય ગયા પછી તમારા હાથને સાબુ અને પાણીથી ધોવા અને સાફ કરવા મહત્વપૂર્ણ છે. ચોમાસા દરમિયાન હાથની સ્વચ્છતાનું ખાસ ધ્યાન રાખો જેથી કરીને તમે ચેપથી સુરક્ષિત રહી શકો. કારણ કે ચોમાસામાં હાનિકારક કીટાણુઓ ઝડપથી વધે છે.
વરસાદમાં વારંવાર ભીના થવાનું ટાળો
આ કરવા કરતાં કહેવું સહેલું છે, છતાં વારંવાર વરસાદમાં ભીનું થવાનું ટાળો. જો તમે બહાર જતા હોવ તો હંમેશા તમારી સાથે છત્રી અથવા રેઈનકોટ રાખો જેથી તમે સંપૂર્ણપણે ભીના ન થાઓ અને બીમાર ન પડો.
Disclaimer: અહીં આપેલી માહિતી માત્ર જાણકારી માટે છે, સંદેશ ન્યૂઝ તેની પુષ્ટિ કરતું નથી. કોઈપણ ઉપાય કરતાં પહેલા તમારા ચિકિત્સકની જરુર મુલાકાત લો.
