આમ આદમી પાર્ટીએ પોતાની જ પાર્ટીના રાજ્યસભા સાંસદ સ્વાતિ માલીવાલ પાસેથી રાજીનામું માંગ્યું છે. પાર્ટીએ કહ્યું કે સ્વાતિ માલીવાલ ભાજપની સ્ક્રિપ્ટ વાંચે છે. જો સ્વાતિ માલીવાલમાં શરમ અને નૈતિકતા હોય તો તેમણે રાજીનામું આપવું જોઈએ. તમને જણાવી દઈએ કે સ્વાતિ માલીવાલે મંગળવારે જ આતિશીને મુખ્યમંત્રી બનાવવાની જાહેરાત પર સવાલ ઉઠાવ્યા હતા. આતિશીના આરોપોના થોડા સમય બાદ AAPએ તેમનું રાજીનામું માંગ્યું હતું.
દિલ્હીમાં અરવિંદ કેજરીવાલના સ્થાને આતિશીને વિધાયક દળના નેતા તરીકે પસંદ કરવામાં આવ્યા છે. કેજરીવાલ આજે મુખ્યમંત્રી પદ પરથી રાજીનામું આપશે. આ પછી આતિશી સરકાર બનાવવાનો દાવો રજૂ કરશે. જો કે, AAP સાંસદ સ્વાતિ માલીવાલે આતિશીને સીએમ બનાવવાના કેજરીવાલના નિર્ણય પર સવાલ ઉઠાવ્યા છે. આ કારણે AAPએ હવે સ્વાતિ માલીવાલનું રાજીનામું માંગ્યું છે. AAP નેતા દિલીપ પાંડેએ કહ્યું સ્વાતિ માલીવાલ એ વ્યક્તિ છે જેને આમ આદમી પાર્ટી તરફથી રાજ્યસભાની ટિકિટ મળે છે પરંતુ ભાજપની પ્રતિક્રિયાની સ્ક્રિપ્ટ લે છે.
