- પુંછ જિલ્લામાં આતંકવાદીઓએ ભારતીય વાયુસેનાના કાફલા પર હુમલો કર્યો હતો
- જેમાં એક જવાન શહીદ થયા હતા, ચાર જવાનો ઘાયલ થયા હતા
- ઘાયલોમાં એક જવાનની હાલત ગંભીર હોવાનું કહેવાય છે
શનિવારે જમ્મુ-કાશ્મીરના પુંછ જિલ્લામાં આતંકવાદીઓએ ભારતીય વાયુસેનાના કાફલા પર હુમલો કર્યો હતો, જેમાં એક જવાન શહીદ થયા હતા જ્યારે અન્ય ચાર જવાનો ઘાયલ થયા હતા. ઘાયલોમાં એક જવાનની હાલત ગંભીર હોવાનું કહેવાય છે. દરમિયાન, સેનાએ આતંકવાદીઓ વિરુદ્ધ સર્ચ ઓપરેશનને વધુ ઝડપી બનાવ્યું છે અને વધારાના સૈન્ય જવાનો પુંછમાં જરા વાલી ગલી (JWG) પહોંચ્યા છે.
આ હુમલાની એક તસવીર સામે આવી છે જેમાં જોઈ શકાય છે કે કેવી રીતે આતંકીઓએ સેનાના વાહનો પર અંધાધૂંધ ગોળીબાર કર્યો હતો. સેનાના કાફલામાં સામેલ ટ્રકની વિન્ડસ્ક્રીન પર બે ડઝનથી વધુ ગોળીઓના નિશાન દેખાય છે. અધિકારીઓના જણાવ્યા અનુસાર, એકે એસોલ્ટ રાઇફલ્સથી સજ્જ આતંકવાદીઓ નજીકના જંગલોમાં ભાગી ગયા છે.
સર્ચ ઓપરેશન યથાવત
સ્થાનિક રાષ્ટ્રીય રાઈફલ્સ (RR) યુનિટે આ વિસ્તારમાં મોટાપાયે સર્ચ અને કોર્ડન ઓપરેશન શરૂ કર્યું છે. આજે પણ અહીંથી પસાર થતા દરેક વાહનની સુરક્ષા દળો દ્વારા તલાશી લેવામાં આવી રહી છે. શંકાસ્પદ લોકોની હિલચાલ વિશે ગુપ્ત માહિતી મળ્યા બાદ સેનાના વાહનો સુરક્ષિત રીતે પુંછ શહેરમાં સર્ચ કરી રહ્યા હતા, જોકે, આ શોધખોળ સફળ રહી હતી. ઓપરેશન દરમિયાન કોઈની ધરપકડ કરવામાં આવી ન હતી.
સૈનિકો જરાંવલીથી એરફોર્સ બેઝ પરત ફરી રહ્યા હતા
આતંકવાદી હુમલો સાંજે લગભગ 6.15 વાગ્યે થયો જ્યારે સૈનિકો જરાંવલીથી એરફોર્સ બેઝ પરત ફરી રહ્યા હતા. અધિકારીઓને આતંકવાદીઓના એ જ જૂથની સંડોવણીની શંકા છે જેમણે ગયા વર્ષે 21 ડિસેમ્બરે નજીકના બફલિયાઝમાં સૈનિકો પર હુમલો કર્યો હતો, જેમાં ચાર સૈનિકો શહીદ થયા હતા અને અન્ય ત્રણ ઘાયલ થયા હતા.
વાયુસેનાનું નિવેદન
ટ્વિટર પર એક પોસ્ટમાં, ભારતીય વાયુસેનાએ કહ્યું, "કાફલાને સુરક્ષિત કરી લેવામાં આવ્યો છે અને વધુ તપાસ ચાલી રહી છે. આતંકવાદીઓ સાથે ગોળીબારમાં, એરમેનોએ વળતો ગોળીબાર કર્યો. આ દરમિયાન ભારતીય વાયુસેનાના પાંચ જવાનોને ગોળીઓ વાગી હતી. અને તેઓ ઘાયલ થયા હતા." સારવાર દરમિયાન એક એરમેનનું નિધન થયું હતું અને આગળની કાર્યવાહી ચાલી રહી છે.
