- જમ્મુ-કાશ્મીરમાં છેલ્લા ઘણા દિવસોથી ઘૂસણખોરો બેફામ
- પઠાણકોટના એક ગામમાં કેટલાક શંકાસ્પદ લોકોને લઇ ફફડાટ
- માહિતી મળતાની સાથે જ સમગ્ર વિસ્તાર છાવણીમાં ફેરવાઈ
જમ્મુ-કાશ્મીરમાં છેલ્લા ઘણા દિવસોથી ઘૂસણખોરોના સમાચાર સામે આવી રહ્યા છે. પઠાણકોટના એક ગામમાં કેટલાક શંકાસ્પદ લોકોને જોવામાં આવ્યા છે. માહિતી મળતાની સાથે જ સમગ્ર વિસ્તાર છાવણીમાં ફેરવાઈ ગયો હતો.
ભારત-પાકિસ્તાન સરહદને અડીને આવેલા પઠાણકોટની ગણતરી દેશના સૌથી સંવેદનશીલ જિલ્લાઓમાં થાય છે. પઠાણકોટ ઘણીવાર આતંકવાદી ઘટનાઓને કારણે હાઈ એલર્ટ પર રહે છે. ખાસ કરીને 15મી ઓગસ્ટ અને 26મી જાન્યુઆરી નજીક હોવાથી પઠાણકોટ સહિત સરહદ પર સુરક્ષા વધારી દેવામાં આવે છે. જો કે, છેલ્લા કેટલાક દિવસોથી પઠાણકોટમાં શંકાસ્પદ નજરે પડવાના અહેવાલો મળી રહ્યા છે.
હવે પઠાણકોટના બમિયાલ સેક્ટરમાં અડધો ડઝન શંકાસ્પદ જોવા મળ્યા છે. ગ્રામજનોએ આ અંગેની માહિતી પોલીસને આપી છે. પોલીસ અને સેનાએ સમગ્ર વિસ્તારને છાવણીમાં ફેરવી દીધો છે.
વિસ્તારમાં સર્ચ ઓપરેશન ચાલુ
આ મામલો ભારત-પાકિસ્તાન સરહદને અડીને આવેલા બમિયાલ સેક્ટરનો છે. અહીં હાજર રામકલવાન ગામમાં ગઈકાલે રાત્રે લગભગ 6 શંકાસ્પદ લોકોને જોવામાં આવ્યા હતા. સ્થાનિક લોકોનું કહેવું છે કે શકમંદોએ સેના જેવો યુનિફોર્મ પહેર્યો હતો. ગામના લોકોએ આ વાતની જાણકારી પોલીસને આપી. પોલીસે પણ તાત્કાલિક ઘટનાસ્થળે પહોંચીને સર્ચ ઓપરેશન શરૂ કર્યું હતું. સુરક્ષા દળોએ પણ ચાર્જ સંભાળી લીધો છે અને સર્ચ ઓપરેશન શરૂ કરી દીધું છે. પરંતુ હજુ સુધી કોઈ શંકાસ્પદની ઓળખ થઈ નથી.
પોલીસને માહિતી આપી
સ્થાનિકના જણાવ્યા મુજબ, ગામના ઘણા લોકોએ તે શકમંદોને જોયા હતા. તેના કેટલાક મિત્રોએ ફોન કરીને જાણ કરી હતી. સવાર પડતાં જ ગ્રામજનોએ પોલીસને જાણ કરી હતી. પોલીસ વિસ્તારમાં તપાસ કરી રહી છે. પરંતુ હજુ સુધી શકમંદો વિશે કંઈ જાણવા મળ્યું નથી.
