દિલ્હી હાઈકોર્ટે કેજરીવાલને આપ્યો ઝટકો, તાત્કાલિક સુનાવણીનો કર્યો ઈન્કાર

• લિકર કેસ મામલે અરવિંદ કેજરીવાલે હાઇકોર્ટમાં કરી અરજી
  
• કેજરીવાલે તેમની ધરપકડ અને રિમાન્ડને ગેરકાયદેસર ગણાવ્યા
• 24 માર્ચ સુધી તાત્કાલિક સુનાવણીની માંગ કરવામાં આવી

દિલ્હીના મુખ્યમંત્રી અરવિંદ કેજરીવાલે 22 માર્ચ, 2024ના રોજ ટ્રાયલ કોર્ટ દ્વારા પસાર કરવામાં આવેલા તેમની ધરપકડ અને રિમાન્ડના આદેશને દિલ્હી હાઈકોર્ટ સમક્ષ પડકાર્યો છે. કેજરીવાલે હાઈકોર્ટમાં દાખલ કરેલી અરજીમાં તેમની ધરપકડ અને રિમાન્ડને ગેરકાયદેસર ગણાવ્યા છે.

દિલ્હીના મુખ્યમંત્રી અરવિંદ કેજરીવાલે ED વતી પોતાની ધરપકડ અને રિમાન્ડને હાઈકોર્ટમાં પડકાર્યો છે. એક દિવસ પહેલા, દિલ્હીની રાઉઝ એવન્યુ કોર્ટે કેજરીવાલને રાહત આપવાનો ઇનકાર કર્યો હતો અને તેમને 28 માર્ચ સુધી ED કસ્ટડીમાં મોકલી દીધા હતા. હાઈકોર્ટમાં દાખલ કરાયેલી અરજીમાં તેમના વતી દલીલ કરવામાં આવી છે કે, EDના ધરપકડ અને રિમાન્ડના આદેશ બંને ગેરકાયદેસર છે. આવી સ્થિતિમાં તે તાત્કાલિક EDની કસ્ટડીમાંથી મુક્ત થવાને પાત્ર છે. કેજરીવાલ વતી હાઇકોર્ટના કાર્યકારી મુખ્ય ન્યાયાધીશ પાસે રવિવાર 24 માર્ચ સુધી તાત્કાલિક સુનાવણીની માંગ કરવામાં આવી છે.

શું હતો સમગ્ર મામલો?

દિલ્હી એક્સાઇઝ પોલિસી કેસમાં મની લોન્ડરિંગના આરોપોની તપાસ કરી રહેલી EDએ ગુરુવારે રાત્રે કેજરીવાલની ધરપકડ કરી હતી. EDની ટીમ પહેલા કેજરીવાલના ઘરે પહોંચી અને સર્ચ કર્યું. આ પછી કેજરીવાલની રાત્રે 9 વાગ્યાની આસપાસ ધરપકડ કરવામાં આવી હતી. ધરપકડ બાદ EDની ટીમે તેને ગઈકાલે એટલે કે શુક્રવારે રાઉઝ એવન્યુ કોર્ટમાં રજૂ કર્યો હતો. EDની ટીમે કોર્ટમાં કેજરીવાલના 10 દિવસના રિમાન્ડની માંગણી કરી હતી.

કેજરીવાલને નીચલી કોર્ટમાંથી રાહત મળી નથી

EDની માંગ પર કોર્ટમાં 2-3 કલાક સુધી સુનાવણી ચાલી. બંને પક્ષોની દલીલો સાંભળ્યા બાદ કોર્ટે કેજરીવાલને રાહત આપવાનો ઇનકાર કર્યો હતો અને તેમને 28 માર્ચ સુધી ED કસ્ટડીમાં મોકલી દીધા હતા. કોર્ટમાં સુનાવણી દરમિયાન, અરવિંદ કેજરીવાલના વકીલોએ EDની ધરપકડનો વિરોધ કર્યો અને કહ્યું કે દેશમાં આ પ્રકારનો આ પહેલો મામલો છે જ્યારે કોઈ વર્તમાન મુખ્યમંત્રીની આ રીતે ધરપકડ કરવામાં આવી હોય. બીજી તરફ, EDએ કેજરીવાલને એક્સાઇઝ પોલિસી કેસમાં મુખ્ય કાવતરાખોર ગણાવ્યા અને કહ્યું કે તેમની પૂછપરછ કરવી જરૂરી છે.