Delhiમાં રહેતા પાકિસ્તાનીઓની ઓળખ કરવામાં મદદ કરે નાગરિકો, પોલીસને કરો જાણ

દિલ્હીના ગૃહમંત્રી આશિષ સૂદે શનિવારે લોકોને રાષ્ટ્રીય રાજધાનીમાં વધુ સમય રોકાયેલા પાકિસ્તાની નાગરિકોને ઓળખવામાં મદદ કરવા અને તાત્કાલિક નજીકના પોલીસ સ્ટેશનને જાણ કરવા નાગરિકોને અપીલ કરી છે. ઉલ્લેખનીય છે કે ભારતે ગુરુવાર, 27 એપ્રિલથી પાકિસ્તાની નાગરિકોને આપવામાં આવેલા તમામ વિઝા (લાંબા ગાળાના વિઝા અને રાજદ્વારી અને સત્તાવાર વિઝા સિવાય) રદ કરવાની જાહેરાત કરી છે.

પાકિસ્તાની નાગરિકોને નવા વિઝા અપાશે નહીં

પાકિસ્તાની નાગરિકો માટે ભારત છોડવાની સમય મર્યાદા પણ 26 એપ્રિલથી 29 એપ્રિલ સુધી નક્કી કરવામાં આવી છે અને હવેથી તેમને કોઈ નવા વિઝા આપવામાં આવશે નહીં, એમ એક નિવેદનમાં જણાવાયું છે. સૂદે જણાવ્યું હતું કે ભારત સરકારના નિર્ણય મુજબ તેમણે પોલીસને પહેલાથી જ સલાહ આપી દીધી છે કે રાષ્ટ્રીય રાજધાનીમાં ગેરકાયદેસર રીતે રહેતા તમામ પાકિસ્તાની નાગરિકોની ઓળખ કરે અને તેમના દેશનિકાલ માટે અન્ય સંબંધિત એજન્સીઓ સાથે સંકલન કરે.

તાત્કાલિક માહિતી પૂરી પાડવા અપીલ

મંત્રી કાર્યાલયે જણાવ્યું હતું કે દિલ્હી સરકાર સ્પષ્ટપણે પાકિસ્તાની નાગરિકોના લાંબા સમય સુધી ગેરકાયદેસર રોકાણથી ઉદ્ભવતી સુરક્ષા ચિંતાઓને શેર કરે છે. તેમણે દિલ્હીના તમામ રહેવાસીઓને કાયદા અમલીકરણ અધિકારીઓને સહયોગ કરવા અને રાષ્ટ્રીય રાજધાનીમાં કોઈપણ શંકાસ્પદ પાકિસ્તાની નાગરિક વિશે કોઈપણ સંબંધિત માહિતી કોઈપણ વિલંબ વિના પૂરી પાડવા વિનંતી કરી.

બંકરોની સફાઈ શરૂ કરવામાં આવી

બીજી તરફ ભારત અને પાકિસ્તાન વચ્ચે વધતા તણાવને કારણે જમ્મુ અને કાશ્મીરમાં આંતરરાષ્ટ્રીય સરહદ (IB) અને નિયંત્રણ રેખા (LoC) ની નજીક આવેલા ગામડાઓના લોકો સતર્ક થઈ ગયા છે. ગામના લોકો તેમના બંકરો સાફ કરી રહ્યા છે અને ઘઉંના પાકની અગાઉથી લણણી કરી રહ્યા છે, જેથી તેઓ કોઈપણ કટોકટી (યુદ્ધ) માં પોતાનું રક્ષણ કરી શકે. સરહદ પારથી ગોળીબાર કે તોપમારાથી પોતાને બચાવવા માટે ભૂગર્ભ બંકરો તૈયાર રાખવાનો નિર્ણય લેવામાં આવ્યો છે. તેમણે કહ્યું કે ગ્રામજનો કોઈપણ પરિસ્થિતિનો સામનો કરવા તૈયાર છે અને સેના સાથે ખભે ખભા મિલાવીને ઉભા છે. સરકાર દ્વારા બનાવવામાં આવેલા હજારો વ્યક્તિગત અને સામૂહિક બંકરો હવે સાફ કરવામાં આવી રહ્યા છે.