Earthquake : ભારતના આ રાજ્યોમાં અનુભવાયા ભૂકંપના આચકા, લોકોમાં ભય

ભારતમાં ફરી એકવાર ભૂકંપના આંચકા અનુભવાયા છે. ભારતનું ઉત્તર-પૂર્વીય રાજ્ય આસામ ભૂકંપથી હચમચી ગયું હતું. આસામના કચર જિલ્લામાં શુક્રવારે ભૂકંપના આંચકા અનુભવાયા હતા. નેશનલ સેન્ટર ફોર સિસ્મોલોજી (NCS) અનુસાર, આસામના કચર જિલ્લામાં આવેલા ભૂકંપની તીવ્રતા રિક્ટર સ્કેલ પર 3.2 માપવામાં આવી હતી.

લોકો ઘરની બહાર દોડી આવ્યા

NCSએ જણાવ્યું કે આ ભૂકંપ શુક્રવારે સાંજે 6.35 મિનિટ અને 13 સેકન્ડે આવ્યો હતો. કચર જિલ્લામાં આવેલા ભૂકંપનું કેન્દ્ર પૃથ્વીથી 25 કિલોમીટરની ઉંડાઈએ હતું. ભૂકંપના આંચકાથી ભયભીત લોકો ઘરો અને ઇમારતોમાંથી બહાર આવી ગયા હતા. ઘણા સમય પછી લોકો પોતપોતાના ઘરે ગયા.

આ કારણે આવે છે ભૂકંપ

ધરતીકંપ એ પૃથ્વીની સપાટી પર બનતી કુદરતી ઘટના છે, જે મુખ્યત્વે પૃથ્વીની આંતરિક રચનામાં તણાવ અને હિલચાલને કારણે થાય છે. ભારતમાં ધરતીકંપનું મુખ્ય કારણ હિમાલય પ્રદેશમાં ટેકટોનિક પ્રવૃત્તિઓ છે. ભારતીય પ્લેટ અને યુરેશિયન પ્લેટ વચ્ચે અથડામણને કારણે અહીં તણાવ થાય છે. આ જ કારણ છે કે ઉત્તરાખંડ, હિમાચલ પ્રદેશ, જમ્મુ-કાશ્મીર અને ઉત્તર-પૂર્વ ભારત ભૂકંપ પ્રત્યે સંવેદનશીલ છે.