બિહારના પટનામાં વિદ્યાર્થીઓનું વિરોધ પ્રદર્શન વધુ ઉગ્ર બન્યું છે. સીએમ આવાસનો ઘેરાવ કરવા જતા પોલીસે વિદ્યાર્થીઓને રોક્યા, પરંતુ વિરોધ વધુ ઉગ્ર બનતા પોલીસ દ્વારા વોટર કેનનનો ઉપયોગ કરવામાં આવ્યો છે. પોલીસે અનેક વિદ્યાર્થીઓની અટકાયત પણ કરી છે.
વિદ્યાર્થીઓનો આક્રોશ ચરમસીમાએ
બિહારની રાજધાની પટનામાં પરીક્ષાઓમાં થતી ગેરરીતિઓ અને મોટાપાયે થયેલા ગોટાળાઓ સામે વિદ્યાર્થીઓનો આક્રોશ ચરમસીમાએ પહોંચ્યો છે. હજારોની સંખ્યામાં એકત્ર થયેલા વિદ્યાર્થીઓએ પરીક્ષા વ્યવસ્થા સામે મોરચો ખોલીને પટનાના રસ્તાઓ પર ઉગ્ર હલ્લાબોલ મચાવ્યો હતો. આ વિરોધ પ્રદર્શન એટલું વિશાળ હતું કે તેણે સમગ્ર શહેરમાં હલચલ મચાવી દીધી છે.
પટનામાં વિદ્યાર્થીઓનો ભારે હોબાળો
પ્રાપ્ત માહિતી અનુસાર, વિદ્યાર્થીઓએ પટનાના જાણીતા ગાંધી મેદાનથી પોતાની માર્ચની શરૂઆત કરી હતી અને તેઓ સીધા મુખ્યમંત્રી આવાસ તરફ આગળ વધ્યા હતા. આ દરમિયાન વિદ્યાર્થીઓએ સરકાર અને સંબંધિત ભરતી બોર્ડ સામે ભારે સૂત્રોચ્ચાર કર્યા હતા. તેમના હાથમાં વિવિધ માંગણીઓ દર્શાવતા પ્લેકાર્ડ્સ પણ જોવા મળ્યા હતા, જેમાં પરીક્ષામાં પારદર્શિતા લાવવા અને દોષિતો સામે કડક કાર્યવાહી કરવાની માંગ કરવામાં આવી હતી. વિદ્યાર્થીઓનો મુખ્ય આક્ષેપ છે કે વારંવાર થતી ગેરરીતિઓને કારણે લાખો યુવાનોનું ભવિષ્ય અંધકારમય બની રહ્યું છે.
વિદ્યાર્થીઓ દ્વારા CM આવાસના ઘેરાવની ચીમકી
આ પ્રદર્શન દરમિયાન સ્થિતિ ત્યારે વધુ તણાવપૂર્ણ બની જ્યારે વિદ્યાર્થીઓએ મુખ્યમંત્રી આવાસનો ઘેરાવ કરવાની ચીમકી આપી. કાયદો અને વ્યવસ્થા જાળવવા માટે તૈનાત કરવામાં આવેલી પોલીસ અને સુરક્ષાકર્મીઓ દ્વારા વિદ્યાર્થીઓને રોકવાના પ્રયાસો કરવામાં આવ્યા હતા. આ દરમિયાન પોલીસ અને પ્રદર્શનકારીઓ વચ્ચે ઘર્ષણ જેવું વાતાવરણ સર્જાયું હતું. ગુસ્સે ભરાયેલા વિદ્યાર્થીઓએ પોલીસ પ્રશાસન સામે પણ પોતાનો વિરોધ નોંધાવ્યો હતો અને તેમની કામસામી સામે સવાલો ઉઠાવ્યા હતા.
જ્યાં સુધી પરીક્ષા પ્રક્રિયા નહીં સુધરે ત્યાં સુધી રહેશે વિરોધ
વિદ્યાર્થીઓનું સ્પષ્ટપણે કહેવું છે કે જ્યાં સુધી સરકાર પરીક્ષા પ્રક્રિયામાં સુધારો નહીં કરે અને કૌભાંડમાં સંડોવાયેલા અસલી દોષિતો સામે કાયદાકીય શિખર સર નહીં કરે, ત્યાં સુધી તેમની આ લડાઈ અટકશે નહીં. આ ઉગ્ર દેખાવોના કારણે પટનાના મુખ્ય માર્ગો પર ભારે ટાફિકજામ સર્જાયો હતો અને વાહનવ્યવહાર પણ ખરાબ રીતે પ્રભાવિત થયો હતો. આ ઘટનાએ રાજ્યની શિક્ષણ વ્યવસ્થા અને પરીક્ષા સંચાલન પ્રણાલી સામે ગંભીર સવાલો ઊભા કર્યા છે, અને સમગ્ર રાજ્યમાં આ વિરોધ પ્રદર્શન ચર્ચાનો વિષય બન્યું છે.
આ પણ વાંચોઃ ભારત સામેના યુદ્ધમાં પાકને ઈરાને આપ્યો હતો મજબૂત ટેકો, શાહબાઝ શરીફે માન્યો હતો આભાર
