Delhi Alert: દિલ્હીની 4 હોસ્પિટલમાં બોમ્બની ધમકી, દિલ્હી પોલીસ એલર્ટ

• દિલ્હીમાં વધુ એકવાર ભયનો માહોલ
  
• 4 હોસ્પિટલમાં મળી બોમ્બની ધમકી
• અલગ અલગ મોબાઇલ નંબર પરથી આવ્યા ફોન 

દેશના વિવિધ રાજ્યોમાં બોમ્બની ધમકી મળી હોવાના સમાચાર સામે આવી રહ્યા છે. પહેલા વિવિધ એરપોર્ટને ઉડાવી દેવાની ધમકી મળી. ત્યારબાદ દિલ્હીની શાળાઓમાં બોમ્બ હોવાની ધમકી મળી ત્યારે વધુ એકવાર રાજધાનીમાં દિલ્હીમાં તંગદિલી જોવા મળી રહી છે. કારણ કે હવે હોસ્પિટલોમાં બોમ્બ હોવાના ધમકી ભર્યા કોલ મળ્યા હતા.

આ 4 હોસ્પિટલમાં આવ્યા ધમકી ભર્યા કોલ

દિલ્હી ફાયર સર્વિસના ડાયરેક્ટર અતુલ ગર્ગ દ્વારા આપવામાં આવેલી માહિતી મુજબ 14 મેના રોજ સવારે 10.45 વાગ્યે દિલ્હીના અશોક વિહાર સ્થિત દીપચંદ હોસ્પિટલમાં ફોન આવ્યો હતો અને બોમ્બ હોવાની ધમકી મળી હતી. ત્યારબાદ 10 વાગેને 55 મિનિટ પર ડાબરીની દાદા દેવ હોસ્પિટલ ખાતે મોબાઈલ નંબર પરથી બોમ્બની ધમકી મળી હતી. આ ઉપરાંત 11:01 કલાકે હેડગેવાર હોસ્પિટલ ફ્લોર બજારને લેન્ડલાઇન નંબર પરથી બોમ્બની ધમકી આપવામાં આવી હતી. આટલુ ઓછું હોય તેમ સવારે 11.12 કલાકે દિલ્હી સ્ટેન્ટ કેન્સર ઇન્સ્ટિટ્યૂટ, જીટીબી હોસ્પિટલના ગેટ નંબર 8 પાસે એક અલગ મોબાઇલ નંબર પરથી કોલ આવ્યો હતો અને બોમ્બની ધમકી આપવામાં આવી હતી.

અગાઉ પણ મળી હતી ધમકી

ધમકી ભર્યા કોલ બાદ દિલ્હી પોલીસ અને દિલ્હી ફાયર વિભાગ એલર્ટ મોડ પર આવી ગઇ છે. હાલમાં સર્ચ ઓપરેશન ચાલી રહ્યુ છે. મહત્વનું છે કે થોડા દિવસો પહેલા સ્કૂલોમાં બોમ્બ હોવાની ધમકી મળી હતી. જે બાદ શાળાઓમાંથી વિદ્યાર્થીઓને ઘરે મોકલી દેવાયા હતા. આ ઉપરાંત 12 મેના રોજ પણ શહેરની 8 હોસ્પિટલો અને ઈન્દિરા ગાંધી ઈન્ટરનેશનલ એરપોર્ટ પર બોમ્બની ધમકીના કોલ આવ્યા હતા. તપાસ કરતાં તમામ કોલ નકલી હોવાનું જાણવા મળ્યું હતું.