કેન્દ્ર સરકારે શિયાળુ સત્રમાં સમગ્ર દેશમાં એકસાથે ચૂંટણી કરાવવા માટે 'વન નેશન, વન ઈલેક્શન'નો પ્રસ્તાવ મૂક્યો હતો. આ માટે 39 સભ્યની સંયુક્ત સંસદીય સમિતિની રચના કરવામાં આવી હતી. આ સમિતિની પ્રથમ બેઠક આજે એટલે કે બુધવારે યોજાઈ. સમિતિની આ પ્રથમ બેઠકમાં 37 સાંસદ હાજર રહ્યા હતા. આ બેઠકમાં કોંગ્રેસ નેતા પ્રિયંકા ગાંધી પણ હાજર હતા. કાયદા મંત્રાલયે લગભગ 18,000 પાનાનું પ્રેઝન્ટેશન આપ્યું હતું. એલજેપી સાંસદ શાંભવી ચૌધરી અને બીજેપી સાંસદ સીએમ રમેશે અંગત કારણોસર આ બેઠકમાં હાજરી આપી ન હતી. બંને સાંસદોએ તેમની ગેરહાજરી અંગે અધ્યક્ષને પહેલેથી જ જાણ કરી દીધી હતી.
ભાજપના સાંસદ પી.પી.ચૌધરીએ અધ્યક્ષતા કરી
39 સભ્યની પેનલનું નેતૃત્વ પૂર્વ કાયદા રાજ્ય મંત્રી અને ભાજપના સાંસદ પીપી ચૌધરીએ કર્યું હતું. આ સમિતિમાં પ્રિયંકા ગાંધી વાડ્રા (કોંગ્રેસ)થી લઈને સંજય ઝા (JD(U), શ્રીકાંત શિંદે (શિવસેના), સંજય સિંહ (AAP), અને કલ્યાણ બેનર્જી (તૃણમૂલ કોંગ્રેસ) સુધીના તમામ મુખ્ય રાજકીય પક્ષોના સભ્યોનો સમાવેશ થાય છે. બેઠકના પ્રથમ દિવસે સમિતિના સભ્યો સમક્ષ 'વન નેશન, વન ઈલેક્શન' સંબંધિત બિલની જોગવાઈઓ મૂકવામાં આવી હતી. તેની જોગવાઈઓને લગતા વિવિધ પાસાઓ પર પણ ચર્ચા કરવામાં આવી હતી. બેઠકમાં તેની જરૂરિયાત અને બિલના સમર્થનમાં અગાઉ આપવામાં આવેલી વિવિધ ભલામણો પણ સમિતિ સમક્ષ મૂકવામાં આવી હતી.
તમામ સાંસદોએ બિલ પર પોતાનો અભિપ્રાય વ્યક્ત કર્યો
જેપીસીની બેઠકમાં કાયદા મંત્રાલય દ્વારા વન નેશન વન ઈલેક્શન બિલ પર પહેલું પ્રેઝન્ટેશન આપવામાં આવ્યું હતું. જે બાદ પહેલા ભાજપ પછી કોંગ્રેસ, સપા, તૃણમૂલ કોંગ્રેસ સહિત તમામ પાર્ટીઓના નેતાઓએ એક પછી એક બિલને લઈને પોતાનો અભિપ્રાય રજૂ કર્યો. જેપીસીની બેઠકમાં કાયદા મંત્રાલયની રજૂઆત બાદ વિપક્ષી સાંસદોએ બિલનો જોરદાર વિરોધ કર્યો હતો. તમામ સાંસદોએ બિલ પર પોતાનો અભિપ્રાય વ્યક્ત કર્યો હતો. જે બાદ વિરોધ પક્ષોના સાંસદોએ બિલનો વિરોધ કર્યો હતો.
વિપક્ષે કર્યો ઉગ્ર વિરોધ
સમાજવાદી પાર્ટીના સાંસદ ધર્મેન્દ્ર યાદવે આ બિલને બંધારણની ભાવના વિરુદ્ધ ગણાવ્યું છે. તેમણે કહ્યું કે, સરકાર પ્રાદેશિક પક્ષોને ખતમ કરવાનું કાવતરું કરી રહી છે. તે જ સમયે, તૃણમૂલ કોંગ્રેસના નેતા કલ્યાણ બેનર્જીએ પૂછ્યું કે શું ખર્ચમાં ઘટાડો કરવો જરૂરી છે કે લોકોના લોકતાંત્રિક અધિકારોનું રક્ષણ કરવું જરૂરી છે. કોંગ્રેસના નેતાઓ મનીષ તિવારી અને મુકુલ વાસનિકે પણ આ બિલનો વિરોધ કર્યો અને તેને બંધારણના મૂળભૂત માળખાની વિરુદ્ધ ગણાવ્યું હતું.
