India: ભારતે ચીનના મુખપત્ર ગણાતા 'ગ્લોબલ ટાઇમ્સ'ના 'X' એકાઉન્ટ પર મુક્યો પ્રતિબંધ

ભારતમાં ચીનના મુખપત્ર 'ગ્લોબલ ટાઇમ્સ'ના 'X' એકાઉન્ટ પર પ્રતિબંધ મૂકવામાં આવ્યો છે. તમને જણાવી દઈએ કે ગ્લોબલ ટાઈમ્સ એક ચીની સરકારી મીડિયા આઉટલેટ છે, જે વ્યાપકપણે ચીની કમ્યુનિસ્ટ પાર્ટીનો પ્રચાર કરી રહ્યું હોવાનું માનવામાં આવે છે. ભારતે ઓપરેશન સિંદૂર અંગે ખોટી માહિતી આપવા બદલ ચીનના ગ્લોબલ ટાઈમ્સની ટીકા કરી હતી. આ પછી ગ્લોબલ ટાઈમ્સ પર પ્રતિબંધ મૂકવામાં આવ્યો.

ભારતે ચીની મીડિયા આઉટલેટ્સની આકરી ટીકા કરી

ભારતે ચીની મીડિયા આઉટલેટની આકરી ટીકા કરી હતી, અને ખોટી માહિતી ફેલાવતા પહેલા તથ્યોની ચકાસણી કરવા અને સોર્સ તપાસવા જણાવ્યું હતું. ગ્લોબલ ટાઈમ્સે એક અહેવાલ પ્રકાશિત કર્યા બાદ આ પ્રતિક્રિયા આવી છે જેમાં દાવો કરવામાં આવ્યો છે કે પાકિસ્તાન વાયુસેના (PAF) એ રાત્રે પાકિસ્તાનમાં અનેક લક્ષ્યો પર ભારતીય હવાઈ હુમલાના જવાબમાં "બીજા ભારતીય ફાઇટર જેટને તોડી પાડ્યું છે".જેમાં "પાકિસ્તાની સેનાના અજાણ્યા સ્ત્રોતો" ટાંકવામાં આવ્યા છે.

આ અંગે પ્રતિક્રિયા આપતા, બેઇજિંગમાં ભારતીય દૂતાવાસના સત્તાવાર હેન્ડલે ટ્વિટર પર શ્રેણીબદ્ધ પોસ્ટ્સમાં કહ્યું, "પ્રિય @globaltimesnews, અમે તમને સલાહ આપીશું કે આવી ખોટી માહિતી ફોરવર્ડ કરતા પહેલા તમારા તથ્યો ચકાસો અને તમારા સ્ત્રોતો તપાસો."

બીજી એક પોસ્ટમાં લખ્યું હતું કે, "પાકિસ્તાન તરફી ઘણા હેન્ડલ ઓપરેશન સિંદૂરના સંદર્ભમાં પાયાવિહોણા દાવાઓ ફેલાવી રહ્યા છે, જનતાને ગેરમાર્ગે દોરવાનો પ્રયાસ કરી રહ્યા છે. જ્યારે મીડિયા આઉટલેટ્સ સ્ત્રોતોની ચકાસણી કર્યા વિના આવી માહિતી શેર કરે છે, ત્યારે તે જવાબદારી અને પત્રકારત્વની નૈતિકતામાં ગંભીર ભૂલ છે."

અગાઉ, ભારતે બુધવારે અરુણાચલ પ્રદેશમાં કેટલાક સ્થળોના નામ બદલવાના ચીનના પગલાને સખત શબ્દોમાં નકારી કાઢ્યો હતો, આ પ્રયાસને "વાહિયાત" ગણાવ્યો હતો અને ભારપૂર્વક જણાવ્યું હતું કે આવી કાર્યવાહી એ "નિર્વિવાદ" હકીકતને બદલી શકતી નથી કે રાજ્ય ભારતનો અભિન્ન ભાગ હતો, છે અને હંમેશા રહેશે. બેઇજિંગે અરુણાચલ પ્રદેશના અનેક સ્થળો માટે ચાઇનીઝ નામોની યાદી જાહેર કર્યા બાદ નવી દિલ્હીની પ્રતિક્રિયા આવી છે. તે આ વિસ્તારને દક્ષિણ તિબેટનો ભાગ હોવાનો દાવો કરે છે.