જમ્મુ અને કાશ્મીરના પહલગામમાં થયેલા આતંકવાદી હુમલા પછી, ભારતે ઓપરેશન સિંદૂર હેઠળ પાડોશી દેશ પાકિસ્તાન પાસેથી એવો બદલો લીધો છે, જેને તે ક્યારેય ભૂલી શકશે નહીં.
TRF વિરુદ્ધ નક્કર પુરાવા અને દસ્તાવેજો રજૂ કરશે
આ ઓપરેશન દ્વારા ભારતે સ્પષ્ટ સંદેશ આપ્યો છે કે આતંકવાદીઓને કોઈપણ કિંમતે બક્ષવામાં આવશે નહીં. મીડિયા રિપોર્ટ મુજબ, આતંકવાદી જૂથો પર પ્રતિબંધ મૂકવા માટે UNSC 1267 પ્રતિબંધ સમિતિ આવતા અઠવાડિયે બેઠક કરશે. જેમાં ભારત પહલગામ આતંકવાદી હુમલામાં પાકિસ્તાન સ્થિત આતંકવાદી જૂથ લશ્કર-એ-તૈયબાના મોરચા TRF વિરુદ્ધ નક્કર પુરાવા અને દસ્તાવેજો રજૂ કરશે. શરૂઆતમાં TRF એ પહલગામ આતંકવાદી હુમલાની જવાબદારી લીધી હતી, જોકે પછીથી તેણે તેનો ઇનકાર કર્યો હતો. આ પછી, ભારતે પાકિસ્તાન પર દબાણ વધારવા માટે યુએન સુરક્ષા પરિષદ દ્વારા TRF ને આતંકવાદી સંગઠન તરીકે સૂચિબદ્ધ કરવાના પ્રયત્નો બમણા કરી દીધા હતા.
TRF એ પહેલા હુમલાની જવાબદારી લીધી અને પછી પીછે હઠ કરી
થોડા દિવસો પહેલા વિદેશ સચિવ વિક્રમ મિશ્રીએ કહ્યું હતું કે પરિસ્થિતિની ગંભીરતાને સમજ્યા પછી, પાકિસ્તાનમાં TRF હેન્ડલર્સે જૂથને પોતાનો દાવો પાછો ખેંચવા એટલે કે હુમલાની જવાબદારી ન લેવા કહ્યું હતું. ભારતે યુએન સુરક્ષા પરિષદમાં તેના વ્યૂહાત્મક ભાગીદારો, મુખ્યત્વે યુનાઇટેડ સ્ટેટ્સ અને ફ્રાન્સ સાથે મળીને પાકિસ્તાન સ્થિત આતંકવાદી જૂથો અને વ્યક્તિઓની યાદી બનાવવા માટે કામ કર્યું હતું. જેમાં લશ્કરના લીડરોએ અને હાફિઝ સઈદ દ્વારા સ્થાપિત આતંકવાદી સંગઠનના પ્રતિનિધિઓનો સમાવેશ થાય છે.
TRF પર પ્રતિબંધ મૂકવાના પ્રયાસો તેજ થયા
TRF પર પ્રતિબંધ મૂકવાના પ્રયાસો છેલ્લા કેટલાક સમયથી ચાલી રહ્યા છે. ભારતે મે અને નવેમ્બર 2024માં યુએન 1267 પ્રતિબંધ સમિતિની દેખરેખ ટીમને અર્ધ-વાર્ષિક અહેવાલોમાં પાકિસ્તાન સ્થિત આતંકવાદી જૂથો માટે TRF ની ભૂમિકા વિશે માહિતી પૂરી પાડી હતી. ડિસેમ્બર 2023ની શરૂઆતમાં ભારતીય પક્ષ દ્વારા TRF જેવા જૂથો દ્વારા જમ્મુ અને કાશ્મીરમાં લશ્કર-એ-તૈયબા અને જૈશ-એ-મોહમ્મદ (Jem) ની કામગીરી વિશે મોનિટરિંગ ટીમને માહિતી આપવામાં આવી હતી.
ભારત પાસે મજબૂત પુરાવા છે
વિદેશ સચિવ વિક્રમ મિશ્રીએ મીડિયા બ્રીફિંગમાં કહ્યું હતું કે અમે ખૂબ જ ટૂંક સમયમાં [નિરીક્ષણ] ટીમ સાથે ફરી મળીશું અને અમે અગાઉ આપેલી માહિતીને અપડેટ કરીશું. ઓપરેશન સિંદૂર હેઠળ આતંકવાદી માળખા પર થયેલા હુમલાઓ પછી આતંકવાદી જૂથો અને પાકિસ્તાની સેના વચ્ચેના સંબંધોના પુરાવા સામે આવ્યા છે અને ભારતની સ્થિતિ મજબૂત થઈ છે.
હકીકતમાં, જ્યારે ફલાહ-એ-ઇન્સાનિયત ફાઉન્ડેશન (FIF) ના વડા, જે લશ્કરના અન્ય પ્રતિનિધિ છે, તેમણે મુરીદકેમાં જૂથના મુખ્ય કેમ્પસ પર થયેલા હુમલામાં માર્યા ગયેલા કેટલાક લોકો માટે અંતિમ સંસ્કારની નમાઝનું નેતૃત્વ કર્યું, ત્યારે તેમની સાથે ગણવેશમાં ઘણા વરિષ્ઠ પાકિસ્તાની સૈન્ય અધિકારીઓ, પંજાબ પોલીસના ઇન્સ્પેક્ટર જનરલ ઉસ્માન અનવર અને પાકિસ્તાનના સૌથી વધુ વસ્તી ધરાવતા પ્રાંતના વરિષ્ઠ અમલદારો જોડાયા હતા. જે સ્પષ્ટપણે દર્શાવે છે કે આતંકવાદીઓને પાકિસ્તાનનો ટેકો છે.
