Indian Navyની મોટી કાર્યવાહી, INS તરકશે 2500 કિલોથી વધુ ડ્રગ્સ જપ્ત કર્યું

ભારતીય નૌકાદળના યુદ્ધ જહાજ INS તરકશે પશ્ચિમ હિંદ મહાસાગરમાં એક મોટી કાર્યવાહી કરી છે અને 2500 કિલોથી વધુ માદક દ્રવ્યોનો જથ્થો જપ્ત કરી લીધો છે. આ કાર્યવાહી દરિયાઈ ગુનાઓને રોકવા અને પ્રાદેશિક સુરક્ષાને મજબૂત બનાવવા માટે હાથ ધરવામાં આવી છે. પેટ્રોલિંગ દરમિયાન, INS તરકશે ભારતીય નૌકાદળના P8I વિમાન તરફથી આ વિસ્તારમાં શંકાસ્પદ જહાજો કાર્યરત હોવા અંગે અનેક ગુપ્ત માહિતી મળી હતી.

INS તરકશે જહાજોને અટકાવવા માટે પોતાનો માર્ગ બદલી નાખ્યો

આ જહાજો ડ્રગ્સની દાણચોરી સહિત ગેરકાયદેસર પ્રવૃત્તિઓમાં સામેલ હતા. ચેતવણીનો જવાબ આપતા INS તરકશે જહાજોને અટકાવવા માટે પોતાનો માર્ગ બદલી નાખ્યો. સંરક્ષણ મંત્રાલયે જણાવ્યું હતું કે તમામ શંકાસ્પદ જહાજોની યોગ્ય રીતે પૂછપરછ કર્યા બાદ P8I અને મુંબઈ ખાતે મેરીટાઈમ ઓપરેશન્સ સેન્ટર સાથે સંકલિત પ્રયાસોને કારણે INS તરકશે જહાજને અટકાવ્યું. વધુમાં શંકાસ્પદ જહાજની ગતિવિધિઓ પર નજર રાખવા અને આ વિસ્તારમાં કાર્યરત અન્ય આવા જહાજોને ઓળખવા માટે જહાજે તેનું અભિન્ન હેલિકોપ્ટર લોન્ચ કર્યું.

મરીન કમાન્ડો સાથે એક નિષ્ણાત બોર્ડિંગ ટીમ શંકાસ્પદ જહાજ પર શોધખોળ કરવા માટે ગઈ હતી. આ દરોડા દરમિયાન તેમને ઘણા સીલબંધ પેકેટ મળી આવ્યા. શોધ અને પૂછપરછ દરમિયાન, જહાજ પરના વિવિધ કાર્ગો હોલ્ડ અને કમ્પાર્ટમેન્ટમાંથી 2,500 કિલોથી વધુ માદક દ્રવ્યો (જેમાં 2,386 કિલો હશીશ અને 121 કિલો હેરોઈનનો સમાવેશ થાય છે) મળી આવ્યો હતો.

ડ્રગ્સનો જથ્થો કેવી રીતે પકડાયો?

INS તરકશ જાન્યુઆરી 2025થી મેરીટાઈમ સિક્યુરિટી મિશન હેઠળ પશ્ચિમ હિંદ મહાસાગરમાં તૈનાત છે. 31 માર્ચ, 2025ના રોજ, પેટ્રોલિંગ દરમિયાન, નૌકાદળના P8I પેટ્રોલ એરક્રાફ્ટે સમુદ્રમાં કેટલાક શંકાસ્પદ જહાજોની જાણ કરી હતી. એવું માનવામાં આવતું હતું કે આ બોટ ડ્રગ્સની દાણચોરીમાં સામેલ હતી. INS તરકશે તાત્કાલિક કાર્યવાહી કરી અને તે જહાજો તરફ આગળ વધવાનું શરૂ કર્યું. અનેક શંકાસ્પદ બોટોની પૂછપરછ કર્યા બાદ નૌકાદળે એક બોટ રોકી અને તેની તપાસ કરી. આ સમય દરમિયાન, હેલિકોપ્ટરથી પણ દેખરેખ રાખવામાં આવી હતી.