Jammu ફરી આતંકવાદીઓના નિશાના પર! અખનૂરમાં આર્મી એમ્બ્યુલન્સ પર ફાયરિંગ

જમ્મુથી વધુ એક આતંકી હુમલાના સમાચાર સામે આવી રહ્યા છે. સોમવારે જમ્મુના અખનૂરમાં આતંકીઓએ આર્મી એમ્બ્યુલન્સ પર ગોળીબાર કર્યો હતો. ફાયરિંગ બાદ સમગ્ર વિસ્તારને સુરક્ષા દળોએ ઘેરી લીધો છે. મળતી માહિતી મુજબ, સોમવારે સવારે સેનાની એમ્બ્યુલન્સ જમ્મુ-કાશ્મીરના અખનૂર શહેરના જોગવાન વિસ્તારમાં જઈ રહી હતી. ત્યારબાદ આતંકવાદીઓના એક જૂથે તેના પર ગોળીબાર કર્યો હતો. આ ઘટના બાદ પોલીસ અને સેના એલર્ટ થઈ ગઈ છે અને સમગ્ર વિસ્તારમાં મોટા પાયે સર્ચ ઓપરેશન ચલાવવામાં આવી રહ્યું છે.

15-20 રાઉન્ડ ફાયરિંગ થયાની માહિતી

અહેવાલ છે કે હુમલો સોમવારે (28 ઓક્ટોબર 2024) સવારે 7:25 વાગ્યે જોગવાનના શિવસન મંદિર પાસે બટ્ટલ વિસ્તારમાં થયો હતો. ત્રણથી ચાર આતંકવાદીઓએ એમ્બ્યુલન્સ અને અન્ય વાહનો પર 15-20 રાઉન્ડ ફાયરિંગ કર્યું હતું. જો કે કોઈ જાનહાનિના સમાચાર નથી.

શુક્રવારે પણ આતંકી હુમલો થયો હતો

આ પહેલા ગુરુવારે (24 ઓક્ટોબર 2024), ગુલમર્ગના પર્યટક આકર્ષણ કેન્દ્રથી 6 કિમી દૂર બોટા પાથરી વિસ્તારમાં આતંકવાદીઓ દ્વારા સેનાના વાહન પર હુમલો કરવામાં આવ્યો હતો. ત્યારબાદ આતંકવાદીઓના ગોળીબારમાં બે સૈનિકો અને એક કૂલીના મોત થયા હતા, જ્યારે એક સૈનિક અને એક કૂલી ઘાયલ થયાના અહેવાલ છે. શુક્રવારે, સુરક્ષા દળોએ ગુલમર્ગ સેક્ટર અને વિસ્તારમાં નિયંત્રણ રેખા (એલઓસી) સાથે મોટા પાયે સર્ચ ઓપરેશન માટે ડ્રોન અને હેલિકોપ્ટર તૈનાત કર્યા હતા. બારામુલ્લાના વરિષ્ઠ પોલીસ અધિક્ષક (એસએસપી) મોહમ્મદ ઝૈદ મલિકે કહ્યું હતું કે બોટા પાથરી હુમલામાં અમને મળેલા પુરાવા મુજબ હુમલામાં 3-4 આતંકવાદીઓ સામેલ હતા.