J&K Election Result: BJPને મળ્યા માતા વૈષ્ણોદેવીના આશીર્વાદ, અયોધ્યા-બદ્રીનાથમાં મળી હતી હાર

લોકસભાની ચૂંટણીમાં ભાજપે મોટા મોટા તીર્થ સ્થાનો જેવા કે અયોધ્યા તથા પેટાચૂંટણીમાં બદ્રીનાથ બેઠક પર હારનો સામનો કરવો પડ્યો હતો. પરંતુ વિધાનસભાની ચૂંટણીમાં બીજેપીને માતા વેષ્ણોદેવીના આશીર્વાદ મળ્યા છે. જમ્મુ-કાશ્મીરની 90 વિધાનસભા બેઠકો પર યોજાયેલી ચૂંટણીની મતગણતરી ચાલી રહી છે. આ દરમિયાન રાજ્યની શ્રી માતા વૈષ્ણોદેવી બેઠકનું પરિણામ જાહેર કરવામાં આવ્યું છે. આ બેઠક પર બીજેપી ઉમેદવાર બલદેવ રાજ શર્મા આ સીટ પર 1995 વોટના માર્જીનથી જીત્યા છે.

ભાજપને મળ્યા આશીર્વાદ

જમ્મુ અને કાશ્મીરની શ્રી માતા વૈષ્ણો દેવી બેઠક પર ભાજપના ઉમેદવાર બલદેવ શર્માને 18199 મત મળ્યા અને આ બેઠક પર બીજા સ્થાને રહેલા અપક્ષ ઉમેદવાર જુગલ કિશોરને 16204 મત મળ્યા અને ત્રીજા સ્થાને કોંગ્રેસના ઉમેદવાર ભૂપેન્દ્ર સિંહને 5655 મત મળ્યા. જમ્મુ-કાશ્મીરની શ્રી માતા વૈષ્ણોદેવી બેઠક ભાજપ માટે ખૂબ જ મહત્વપૂર્ણ હતી. કારણ કે લોકસભા ચૂંટણી 2024માં અયોધ્યા (ફૈઝાબાદ) અને ઉત્તરાખંડ પેટાચૂંટણીમાં બદ્રીનાથ સીટ પર ભાજપનો પરાજય થયો હતો. હવે ભાજપે આ બેઠક જીતી લીધી છે.

અયોધ્યામાં મળી હતી હાર

મહત્વનું છે કે આ બેઠક જમ્મુ વિભાગના રિયાસી જિલ્લામાં આવે છે. અહીં 25 સપ્ટેમ્બરે વિધાનસભા ચૂંટણીના બીજા તબક્કામાં આ બેઠક પર મતદાન યોજાયુ હતું. ભાજપને આ સીટ પર સરળ જીતની અપેક્ષા હતી કારણ કે આ સીટ હિન્દુ સાંસ્કૃતિક વારસા સાથે જોડાયેલી છે. જો કે લોકસભા ચૂંટણીમાં પણ ભાજપને અયોધ્યામાં આવા જ પરિણામની આશા હતા. પરંતુ આ બેઠક ( ફૈઝાબાદ) બેઠક સમાજવાદી પાર્ટીના અવધેશ પ્રસાદે આંચકી લીધી હતી.

સાંજે ચિત્ર થશે સ્પષ્ટ

જો જમ્મુ-કાશ્મીર ચૂંટણીના પરિણામોની વાત કરીએ તો કોંગ્રેસ ગઠબંધન 35 બેઠકો પર અને ભાજપ 29 બેઠકો પર આગળ છે. જો કે તે સ્પષ્ટ છે કે ભાજપ જમ્મુ-કાશ્મીરમાં સરકાર બનાવવામાં ઘણી પાછળ છે અને કોંગ્રેસ ઠબંધન સરકાર બનાવી શકે છે. જો કે રાજ્યની સીટોનું સ્પષ્ટ પરિણામ સાંજ સુધીમાં જ ખબર પડશે કે રાજ્યમાં સત્તાની ચાવી કયા પક્ષ પાસે રહેશે.