જમ્મુ-કાશ્મીરના કઠુઆ જિલ્લામાં સુરક્ષા દળો અને આતંકવાદીઓ વચ્ચે એન્કાઉન્ટર ચાલી રહ્યું છે. સુરક્ષા દળોએ સમગ્ર વિસ્તારને ઘેરી લીધો છે અને કાર્યવાહી ચાલુ છે. જુથાના વિસ્તારમાં 4-5 આતંકવાદીઓ છુપાયેલા હોવાની માહિતી મળ્યા બાદ, સુરક્ષા દળોએ સર્ચ ઓપરેશન શરૂ કર્યું હતું જે દરમિયાન ફાયરિંગ થયું. સોમવારે કઠુઆના હીરાનગર સેક્ટરમાં આતંકવાદીઓ અને સુરક્ષા દળો વચ્ચે એન્કાઉન્ટર થયું હતું. પછી આતંકવાદીઓએ 3 લોકોને બંધક બનાવી લીધા હતા. જો કે ત્રણેય તક મળતાં જ આતંકવાદીઓના ચુંગાલમાંથી છટકી ગયા. આ દરમિયાન યુવતીને સામાન્ય ઈજાઓ થઈ હતી.
બીજા દિવસે પણ ગોળીબાર
જમ્મુ-કાશ્મીરના કઠુઆ વિસ્તારમાં કેટલાક આતંકવાદીઓ જોવા મળ્યા બાદ ગોળીબાર થયો હતો. સુરક્ષા દળોએ વિસ્તારને ઘેરી લીધો છે. માહિતી અનુસાર જમ્મુ અને કાશ્મીરના કઠુઆમાં ભીષણ અથડામણ બીજા દિવસે પણ ચાલુ છે. સુરક્ષા દળોએ 4 થી 5 આતંકવાદીઓને ઘેરી લીધા છે. સમગ્ર વિસ્તારને કોર્ડન કરી દેવામાં આવ્યો છે. આ એન્કાઉન્ટરમાં SDPO બોર્ડર કઠુઆ ધીરજ સિંહ કટોચ અને બે ASOG જવાન ઘાયલ થયાના અહેવાલ છે.
મહત્વનું છે કે તમામ શંકાસ્પદ આતંકીઓને ઘેરી લેવામાં આવ્યા છે અને ચારેય તરફથી ઘેરી લેવાયા છે. આ શંકાસ્પદ આતંકીઓ ઉજ્જ દરિયાથી સુફૈન થઇને ત્યાં પહોંચ્યા હતા. અહીં છેલ્લા 4 દિવસથી મોટા પ્રમાણમાં આતંકવાદ વિરોધી અભિયાન ચલાવવામાં આવી રહ્યું છે.
જુથાના વિસ્તારમાં ગોળીબાર
માહિતી આપતા અધિકારીઓએ જણાવ્યું કે જ્યારે સુરક્ષા દળોએ આજે સવારે રાજબાગના ઘાટી જુથાના વિસ્તારમાં આતંકવાદીઓને જોયા ત્યારે ગોળીબાર કર્યો હતો. તેમણે કહ્યું કે વધારાના દળો મોકલવામાં આવ્યા છે અને વિગતવાર માહિતીની રાહ જોવાઈ રહી છે. એવું માનવામાં આવે છે કે આ આતંકવાદીઓનું એ જ જૂથ છે જે રવિવારે સાંજે જિલ્લાના હીરાનગર સેક્ટરમાં થયેલા એન્કાઉન્ટર બાદ ભાગી ગયા હતા.
