- રિયાસીના ધરમરી ગામમાં ધાર્મિક સ્થળમાં તોડફોડ મામલે કાર્યવાહી
- અગાઉ તોડફોડ મામલે પોલીસે 12 લોકોની કરી હતી અટકાયત
- મંદિરમાં તોડફોડ કરવાના કેસમાં વધુ ત્રણ આરોપીઓ ઝડપાયા
રિયાસીના ધરમરી ગામમાં ધાર્મિક સ્થળમાં કથિત તોડફોડ મામલે પોલીસે વધુ ત્રણ શકમંદોની અટકાયત કરી છે. અગાઉ આ કેસમાં પોલીસે 12 લોકોની અટકાયત કરી હતી. પોલીસ અધિકારીએ કહ્યું કે SIT કેસને ઉકેલવા માટે અલગ-અલગ પાસાઓ પર કામ કરી રહી છે. તેમણે સ્થાનિક લોકોને શાંતિ જાળવવાની અપીલ પણ કરી છે.
જમ્મુ અને કાશ્મીરના રિયાસીમાં કથિત રીતે અજાણ્યા લોકો દ્વારા મંદિરમાં તોડફોડ કરવાના કેસમાં વધુ ત્રણ આરોપીઓની અટકાયત કરવામાં આવી છે. આ ઘટનાના વિરોધમાં રવિવારે સ્થાનિક લોકોએ પ્રદર્શન પણ કર્યું હતું.
ધાર્મિક સ્થળમાં તોડફોડ મામલે વધુ 3 આરોપીઓની અટકાયત
પોલીસ અધિકારીએ જણાવ્યું કે પોલીસે રિયાસી જિલ્લામાં એક પૂજા સ્થળ પર કથિત તોડફોડ મામલે વધુ ત્રણ આરોપીઓની અટકાયત કરી છે. તેમણે જણાવ્યું કે શનિવારે સાંજે ધર્મરીના એક ગામમાં એક મુલાકાતીને પૂજા સ્થળ ક્ષતિગ્રસ્ત હાલતમાં મળ્યું હતું. આ પછી વિસ્તારમાં તણાવ સર્જાયો હતો અને લોકોએ આ ઘટના વિરુદ્ધ પ્રદર્શન પણ કર્યું હતું.
સમગ્ર ઘટનાની માહિતી મળતાની સાથે જ પોલીસ ટીમ ઘટનાસ્થળે પહોંચી હતી અને સંબંધિત કલમો હેઠળ એફઆઈઆર નોંધી હતી અને આરોપીને પકડવા માટે નાયબ પોલીસ અધિક્ષકના નેતૃત્વમાં એસઆઈટીની રચના કરી હતી. પોલીસ અધિકારીએ એમ પણ કહ્યું કે, રવિવાર સુધી આ કેસમાં 12 લોકોની ધરપકડ કરવામાં આવી છે. દરમિયાન, રવિવાર અને સોમવારની વચ્ચેની રાત્રે વધુ ત્રણ શંકાસ્પદ લોકોની અટકાયત કરવામાં આવી છે. આ કેસમાં પૂછપરછ માટે અટકાયત કરાયેલા લોકોની કુલ સંખ્યા 15 પર પહોંચી ગઈ છે.
વિસ્તારમાં ભારે સુરક્ષા દળ તૈનાત
સ્થાનિક અધિકારીએ જણાવ્યું હતું કે, કાયદો અને વ્યવસ્થા જાળવવા માટે સાવચેતીના ભાગ રૂપે, સંવેદનશીલ વિસ્તારોમાં મોટી સંખ્યામાં પોલીસ અને અર્ધલશ્કરી દળોને તૈનાત કરવામાં આવ્યા છે.
