મહારાષ્ટ્ર વિધાનસભાની ચૂંટણી માટે ભાજપે 99 ઉમેદવારોની જાહેરાત કરી દીધી છે. જેમાં ભાજપે નાગપુર દક્ષિણ-પશ્ચિમ બેઠક પરથી ડેપ્યુટી સીએમ દેવેન્દ્ર ફડણવીસને ટિકિટ આપી છે. ઉમેદવારોની યાદી જાહેર થયા બાદ દેવેન્દ્ર ફડણવીસની પ્રથમ પ્રતિક્રિયા આવી છે.
શું બોલ્યા દેવેન્દ્ર ફડણવીસ ?
દેવેન્દ્ર ફડણવીસે ટ્વિટ કરીને કહ્યું કે ભારતીય જનતા પાર્ટીએ મને છઠ્ઠી વખત વિધાનસભા ચૂંટણીમાં તક આપી. ભારતીય જનતા પાર્ટીએ ફરી એકવાર મારામાં જે વિશ્વાસ દર્શાવ્યો છે તેના માટે હું વડા પ્રધાન નરેન્દ્ર મોદી, કેન્દ્રીય ગૃહ પ્રધાન અમિત શાહ, ભાજપના રાષ્ટ્રીય અધ્યક્ષ જેપી નડ્ડા અને કેન્દ્રીય ચૂંટણી સમિતિના તમામ આદરણીય નેતાઓનો અત્યંત આભારી છું. વધુમાં કહ્યું કે મારા પ્રયાસો પાર્ટીનું નેતૃત્વ, મારા દક્ષિણ-પશ્ચિમ નાગપુર મતવિસ્તારના નાગરિકો અને મહારાષ્ટ્રમાં મારી માતૃભૂમિના લોકો દ્વારા દર્શાવવામાં આવેલા વિશ્વાસને યોગ્ય ઠેરવવાનો રહેશે. ભાજપની પ્રથમ યાદીમાં મારા સિવાય અન્ય 98 ઉમેદવારોની જાહેરાત કરવામાં આવી છે, જેમાં અમારા પ્રદેશ અધ્યક્ષ ચંદ્રશેખર બાવનકુળેનો પણ સમાવેશ થાય છે. તેમને અને આ શોર્ટલિસ્ટમાં સામેલ તમામને હાર્દિક અભિનંદન અને તેમને શુભકામનાઓ!
પ્રચાર માટે એક મહિનાથી પણ ઓછો સમય
ઉલ્લેખનીય છે કે મહારાષ્ટ્રમાં 20 નવેમ્બરે વિધાનસભાની ચૂંટણી યોજાશે. આના એક મહિના પહેલા જ ભાજપે પોતાના ઉમેદવારોની યાદી જાહેર કરી છે. હવે ઉમેદવારો પાસે પોતપોતાના મતવિસ્તારમાં પ્રચાર માટે બહુ ઓછા દિવસો બાકી છે. મહારાષ્ટ્રમાં 288 બેઠકો પર યોજાઈ રહેલી ચૂંટણીના પરિણામો 23 નવેમ્બરે જાહેર કરવામાં આવશે. દેવેન્દ્ર ફડણવીસ 2009થી નાગપુર દક્ષિણ-પશ્ચિમ બેઠક પરથી ચૂંટણી જીતી રહ્યા છે. ભાજપે દેવેન્દ્ર ફડણવીસના નેતૃત્વમાં 2019ની ચૂંટણી લડી હતી. ભાજપે 105 બેઠકો જીતી હતી અને અવિભાજિત શિવસેના સાથે ગઠબંધન કર્યું હતું. આ વખતે તે એકનાથ શિંદે જૂથની શિવસેના અને અજિત પવારની એનસીપી સાથે ગઠબંધન કરીને ચૂંટણી લડી રહી છે.
