તમિલનાડુ વિધાનસભા ચૂંટણીના પરિણામો બાદ કોઈ પક્ષને સ્પષ્ટ બહુમતી ન મળતા જે રાજકીય ગૂંચવાડો સર્જાયો હતો, તેનો ઉકેલ લાવવામાં રાહુલ ગાંધી અને જોસેફ વિજય વચ્ચેની 17 વર્ષ જૂની મજબૂત મિત્રતાએ નિર્ણાયક ભૂમિકા ભજવી છે. ટીવીકે (TVK) સૌથી મોટા પક્ષ તરીકે ઉભરી આવ્યા બાદ કોંગ્રેસે તેને સમર્થન જાહેર કર્યું, જેની પાછળ માત્ર સત્તાનું ગણિત નહીં પરંતુ વર્ષો જૂના વૈચારિક સંબંધો જવાબદાર છે.
2009 ની એ ઐતિહાસિક મુલાકાત
આ સંબંધોનો પાયો ઓગસ્ટ 2009 માં નખાયો હતો. તે સમયે વિજય તમિલ સિનેમાના સુપરસ્ટાર હતા અને રાહુલ ગાંધી રાજકારણમાં યુવા નેતા તરીકે ઉભરી રહ્યા હતા. વિજયના પિતા એસ.એ. ચંદ્રશેખર કોંગ્રેસ તરફી ઝુકાવ ધરાવતા હતા અને તેઓ જ પોતાના પુત્રને રાહુલ ગાંધીને મળવા દિલ્હી લઈ ગયા હતા. વિજયે પોતે સ્વીકાર્યું હતું કે રાહુલ ગાંધીનું નિમંત્રણ મળવું એ તેમના માટે ગૌરવની વાત હતી અને તેમણે શૂટિંગ રદ કરીને પણ આ મુલાકાત કરી હતી.
વિચારધારાનું બંને વચ્ચેનું જોડાણ
મુલાકાત દરમિયાન બંને વચ્ચે સિનેમા, રાજકારણ અને સામાજિક મુદ્દાઓ પર એક કલાકથી વધુ ચર્ચા થઈ હતી. કોંગ્રેસના નેતાઓના મતે, વિજય તે સમયે જ કોંગ્રેસની ધર્મનિરપેક્ષ વિચારધારાથી પ્રભાવિત હતા. તે સમયે રાહુલ ગાંધીએ વિજયને યુવા કોંગ્રેસના પ્રમુખ બનવાની ઓફર પણ આપી હતી, પરંતુ તત્કાલીન રાજકીય દબાણો અને કરુણાનિધિ પરિવારના ફિલ્મ ઉદ્યોગ પરના વર્ચસ્વને કારણે વિજયે ત્યારે સક્રિય રાજકારણમાં પ્રવેશવાનું ટાળ્યું હતું.
સતત સંપર્ક અને ગઠબંધન
2009 થી 2024 સુધી બંને નેતાઓ સતત એકબીજાના સંપર્કમાં રહ્યા છે. વિજયે પોતાની પાર્ટી TVK લોન્ચ કરી ત્યારે પણ રાહુલ ગાંધીને જાણ કરી હતી. તાજેતરની ચૂંટણીમાં વિજયના પ્રભાવશાળી પ્રદર્શન બાદ રાહુલ ગાંધીએ તેમને અભિનંદન પાઠવ્યા હતા. કોંગ્રેસના નેતાઓ માને છે કે વિજયે ભાજપ વગર અન્ય પક્ષો સાથે સરકાર બનાવવાની તક હોવા છતાં કોંગ્રેસને પસંદ કરી, કારણ કે તેમની અને કોંગ્રેસની 'સેક્યુલર' વિચારધારા એકસમાન છે.
17 વર્ષના અતૂટ વિશ્વાસ અને સમાન વિચારધારાનું પરિણામ
આમ, તમિલનાડુમાં રચાયેલી આ નવી સરકાર માત્ર રાજકીય જોડાણ નથી, પરંતુ 17 વર્ષના અતૂટ વિશ્વાસ અને સમાન વિચારધારાનું પરિણામ છે. જે દોસ્તી ૨૦૦૯માં દિલ્હીના એક ડ્રોઈંગ રૂમમાં શરૂ થઈ હતી, તેણે આજે તમિલનાડુના શાસનનું સ્વરૂપ ધારણ કર્યું છે.
આ પણ વાંચોઃ Vijay Oath Ceremony: આજથી તમિલનાડુમાં વિજય સરકાર, 9 મંત્રીઓ પણ લેશે શપથ
