રવિવારે દિલ્હીનું વાતાવરણ એકાએક બદલાઈ ગયું હતું. શહેરમાં થયેલા હળવા વરસાદ અને ફૂંકાયેલા જોરદાર પવનોએ લાંબા સમયથી હેરાન કરી રહેલી ભેજવાળી ગરમીમાંથી નાગરિકોને મોટી રાહત અપાવી છે. વાતાવરણમાં આવેલા આ આહલાદક ફેરફારથી રવિવારે દિલ્હીવાસીઓએ લાંબા સમય બાદ ખુશનુમા મોસમનો અનુભવ કર્યો હતો. જોકે, આ વરસાદની અસર હવાઈ સેવાઓ પર પણ જોવા મળી હતી.
ફ્લાઇટ્સ પર વરસાદની અસર
ભારે વરસાદ અને તેજ પવનને કારણે દિલ્હી એરપોર્ટ પર ઉતરાણ કરવામાં મુશ્કેલી પડતા કુલ 15 ફ્લાઇટ્સને ડાયવર્ટ કરવી પડી હતી. એરપોર્ટ સૂત્રોના જણાવ્યા અનુસાર, આમાં 10 સ્થાનિક અને 5 આંતરરાષ્ટ્રીય ફ્લાઇટ્સનો સમાવેશ થાય છે. ખરાબ હવામાનને ધ્યાનમાં રાખીને સુરક્ષિત લેન્ડિંગ માટે આ ફ્લાઇટ્સને જયપુર અને લખનૌ તરફ વાળવામાં આવી હતી.
તાપમાન અને આગામી આગાહી
ભારતીય હવામાન વિભાગ (IMD) મુજબ, રવિવારે બપોર સુધી શહેરનું તાપમાન 28 ડિગ્રી સેલ્સિયસની આસપાસ હતું, પરંતુ ત્યારબાદ ગાજવીજ સાથે વરસાદ શરૂ થયો હતો. છેલ્લા 24 કલાકમાં દિલ્હીના કેટલાક વિસ્તારોમાં મધ્યમ વરસાદ નોંધાયો છે. શહેરમાં લઘુત્તમ તાપમાન 26°C થી 29°C ની વચ્ચે અને મહત્તમ તાપમાન 35°C થી 36°C ની વચ્ચે રહ્યું હતું. પવનની ગતિ પાલમ વિસ્તારમાં 37 કિમી પ્રતિ કલાક સુધી પહોંચી હતી. આગામી બે દિવસમાં મહત્તમ તાપમાનમાં 2-3 ડિગ્રીનો ઘટાડો થવાની શક્યતા છે.
ઉત્તર ભારતમાં ચોમાસાની ગતિવિધિ
હવામાન વિભાગે સ્પષ્ટ કર્યું છે કે આગામી ચાર દિવસમાં હરિયાણા, પંજાબ અને રાજસ્થાનના બાકીના ભાગોમાં ચોમાસુ આગળ વધવા માટે સ્થિતિ સંપૂર્ણપણે અનુકૂળ છે. દિલ્હીમાં શુક્રવાર સુધી હળવા વરસાદ અને તેજ પવનોનો દોર ચાલુ રહેવાની શક્યતા છે. રાજસ્થાનના કેટલાક વિસ્તારોમાં પણ ભારે વરસાદની આગાહી કરવામાં આવી છે.
બીજી તરફ, પર્વતીય રાજ્ય હિમાચલ પ્રદેશમાં પણ ચોમાસુ સક્રિય છે. હવામાન વિભાગે શિમલા માટે 'ઓરેન્જ વોર્નિંગ' જારી કરી છે. ખાસ કરીને મંડી, સિરમૌર, ચંબા અને કાંગડા જિલ્લાઓમાં આગામી દિવસોમાં ભારેથી અતિ ભારે વરસાદ થવાની ચેતવણી આપવામાં આવી છે. પર્વતીય વિસ્તારોમાં રહેતા લોકોને સાવચેત રહેવા સૂચના આપવામાં આવી છે. દિલ્હી સહિત સમગ્ર ઉત્તર ભારતમાં ચોમાસુ હવે પૂરેપૂરું જામી રહ્યું હોય તેવું જણાય છે.
આ પણ વાંચોઃ Telangana: નાલગોંડામાં ભયાનક માર્ગ અકસ્માત, કાર અને બસની ટક્કરમાં 4 લોકોના મોત
