દિલ્હી બોમ્બ વિસ્ફોટો બાદ ફરીદાબાદની અલ-ફલાહ યુનિવર્સિટી ચર્ચાનું કેન્દ્ર બની છે. કારણ કે વિસ્ફોટના કાવતરામાં સામેલ કેટલાક આરોપીઓ યુનિવર્સિટીની મેડિકલ કોલેજમાં કામ કરતા હતા. શરૂઆતની તપાસમાં પોલીસે ત્રણ આરોપીઓ, ડૉ. મુઝમ્મિલ, ડૉ. આદિલ, અને ડૉ. શાહીનની ધરપકડ કરી હતી. જેઓ અલ-ફલાહ યુનિવર્સિટીમાં પ્રોફેસર હતા. આ ઘટનાના પગલે યુનિવર્સિટી અને તેની સંલગ્ન મેડિકલ કોલેજ સમાચારમાં છે. યુનિવર્સિટીની વેબસાઇટ પણ ડાઉન હતી અને કોઈ માહિતી દર્શાવતી ન હતી.
ED અને NMC દ્વારા કાર્યવાહી
મેડિકલ રેગ્યુલેટરી ઓથોરિટી, નેશનલ મેડિકલ કાઉન્સિલએ યુનિવર્સિટીની માન્યતા અંગે નોટિસ જાહેર કરી છે. ED અને અન્ય નાણાકીય તપાસ એજન્સીઓ પણ હવે અલ-ફલાહ યુનિવર્સિટી સાથે સંકળાયેલા ડોકટરોની નાણાકીય તપાસ કરે તેવી અપેક્ષા છે. સૂત્રોના જણાવ્યા મુજબ EDના ડિરેક્ટરની કેન્દ્રીય ગૃહમંત્રી સાથેની બેઠક બાદ તપાસનો નિર્ણય લેવામાં આવ્યો હતો. એજન્સીઓ યુનિવર્સિટીનું ફોરેન્સિક ઓડિટ પણ કરશે. NMCના અધ્યક્ષે યુનિવર્સિટીની NAAC માન્યતા માટે જવાબદાર મેડિકલ રેગ્યુલેટરી ઓથોરિટી તરીકે યુનિવર્સિટીને કારણદર્શક નોટિસ જાહેર કરી છે. તેમણે જણાવ્યું હતું કે તપાસ એજન્સીઓના તારણોના આધારે કાનૂની જોગવાઈઓ અનુસાર યોગ્ય કાર્યવાહી કરવામાં આવશે અને યુનિવર્સિટીની NAAC માન્યતા રદ કરવી કે કેમ તે અંગે નિર્ણય લેવામાં આવશે.
